काठमाडौँ– हर्कराज राई (हर्क साम्पाङ) ले प्रधानमन्त्री बालेन्द्र शाह को राजीनामा माग गरेका छन् ।
श्रम संस्कृति पार्टीका अध्यक्ष तथा प्रतिनिधिसभा सदस्यसमेत रहेका राईले विज्ञप्ति जारी गर्दै प्रधानमन्त्री शाह संसदीय अभ्यासमा गैरजिम्मेवार देखिएको र संसदको अपमान गरेको आरोप लगाएका हुन् ।
विज्ञप्तिमा प्रधानमन्त्री शाहले जेठ २८ गते राष्ट्रपतिले नीति तथा कार्यक्रम प्रस्तुत गरिरहँदा सभा छोडेर बाहिरिएको, जेठ ३० गतेको छलफलमा अनुपस्थित रहेको तथा नजिकैको कार्यालयमा बसेर संसदको गतिविधि प्रत्यक्ष प्रसारणमार्फत हेरे पनि सदनमा जवाफ दिन नआएको उल्लेख गरिएको छ ।
सांसद राईले प्रधानमन्त्रीका यी गतिविधिलाई संसदीय परम्पराको बेवास्ता तथा “संसदीय अभ्यासको इतिहासमा कालो धब्बा” को संज्ञा दिएका छन् ।
“जनताको सार्वभौम सदनलाई अपमान गरेर त्यही संसदबाट चुनिएका प्रधानमन्त्री कुन नैतिकताको आधारमा कुर्सीमा बसिरहेका छन् ?” विज्ञप्तिमा प्रश्न गरिएको छ ।
उनले कर्तव्य पूरा गर्न नसक्ने व्यक्तिले नैतिकताको आधारमा पदबाट राजीनामा दिनुपर्ने बताएका छन् । साथै सरकारले संसदलाई छलेर अध्यादेशको बाटोबाट अघि बढ्न खोजेको र न्यूनतम जिम्मेवारीसमेत पूरा गर्न नसकेको आरोप पनि लगाएका छन् ।
