काठमाडौं । प्रतिनिधिसभाको बैठकमा प्रमुख प्रतिपक्षी दल नेपाली कांग्रेसले प्रधानमन्त्रीलाई स्वयं सदनमा उपस्थित भएर जवाफ दिन रुलिङ गर्न सभामुखसँग माग गरेको छ।
कांग्रेस संसदीय दलका नेता भीष्मराज आङ्देम्बेले सरकारको नीति तथा कार्यक्रममाथि उठेका प्रश्नको जवाफ प्रधानमन्त्रीबाटै आउनुपर्ने भन्दै सभामुखसँग स्पष्ट रुलिङको माग गरेका हुन्। उनले संसद्मा प्रधानमन्त्रीको अनुपस्थिति उचित नभएको टिप्पणी गर्दै सरकार प्रत्यक्ष रूपमा जवाफदेही बन्नुपर्ने बताएका थिए।
तर सभामुखले भने तत्काल रुलिङ गर्न अस्वीकार गरेका छन्। सभामुखले आज प्रधानमन्त्रीसँग यस विषयमा छलफल तय भइसकेको जानकारी दिँदै संवादपछि मात्रै भोलिको कार्यसूची अघि विपक्षी दलहरूसँग थप छलफल गर्ने बताएका छन्।
सभामुखको उक्त भनाइपछि केही समय सदनमा विपक्षी सांसदहरूले आपत्ति जनाएका थिए। विपक्षी दलहरूले प्रधानमन्त्री संसद्मा उपस्थित भएर नै उठेका प्रश्नको जवाफ दिनुपर्ने अडान दोहोर्याएका छन्।
