काठमाडौं। अख्तियार दुरुपयोग अनुसन्धान आयोगले घुस लिएको आरोपमा सशस्त्र प्रहरी निरीक्षक वकिल अधिकारी विरुद्ध विशेष अदालतमा मुद्दा दायर गरेको छ।
आयोगका अनुसार सशस्त्र प्रहरी बल नेपाल अन्तर्गत सुरक्षा बेस धनुषामा कार्यरत अधिकारीले कमला–ढल्केबर–बागमती सडक निर्माण क्षेत्रमा माटो तथा ग्राभेल फिलिङमा प्रयोग हुने सवारीसाधन रोक्दै सेवाग्राहीसँग ४० हजार रुपैयाँ घुस लिएको आरोप छ।
माटो झार्न नदिई रकम मागिरहेको अवस्थामा उनलाई पक्राउ गरिएको थियो। आयोगका प्रवक्ता सुरेश न्यौपानेले आरोपीविरुद्ध बिगोबमोजिम कारबाही माग गरिएको जानकारी दिएका छन्।
यसैबीच, नेपाल सरकार प्रतिवादी रहेको चन्द्रबहादुर अधिकारीसम्बन्धी घुस मुद्दामा सरकारी साक्षीका रूपमा बयान दिएकी सुमित्राकुमारी पुडासैनी विरुद्ध पनि अख्तियारले मुद्दा दायर गरेको छ।
आयोगका अनुसार पुडासैनीले सरकारी साक्षीका रूपमा दिएको बयान प्रतिकूल देखिएपछि उनीविरुद्ध ५० लाख रुपैयाँ बराबरको बिगो दाबीसहित विशेष अदालतमा मुद्दा दायर गरिएको हो।
