स्याङ्जा — स्याङ्जाको पुतलीबजार नगरपालिका–४ का वडा अध्यक्ष शिवबहादुर थापा मानव बेचबिखन तथा ओसारपसारसम्बन्धी आरोपमा पक्राउ परेका छन्।
पीडितको उजुरीका आधारमा मानव बेचबिखन अनुसन्धान ब्युरोको टोलीले सोमबार कास्कीबाट उनलाई पक्राउ गरेको हो। ब्युरोका प्रहरी उपरीक्षक राजन लिम्बुले पक्राउ पुष्टि गर्दै घटनाबारे थप अनुसन्धान भइरहेको जानकारी दिएका छन्।
नेपाली कांग्रेस बाट २०७९ सालको स्थानीय तह निर्वाचनमा निर्वाचित थापाले १ हजार १२३ मत प्राप्त गर्दै एमाले उम्मेदवारलाई पराजित गरेका थिए। निर्वाचितपछि करिब १५ महिना वडा अध्यक्षको जिम्मेवारी सम्हालेका उनी २०८० भदौ १५ गते स्वास्थ्य उपचारको बहानामा सम्पर्कविहीन बनेका थिए। पछि उनी अमेरिका पुगेको खुलेको थियो।
स्थानीय स्रोतका अनुसार थापामाथि केही व्यक्तिलाई पैदल मार्ग हुँदै अमेरिका पठाउने र केहीसँग रकम लिएर अलपत्र पार्ने आरोप लाग्दै आएको थियो। करिब साढे दुई वर्षपछि नेपाल फर्किएका उनी पुनः वडा कार्यालयमा सक्रिय देखिएका थिए।
थापा विदेशमा रहेका बेला पनि नगरपालिकाले २०८० भदौदेखि २०८१ असारसम्मको सेवा–सुविधाबापत २ लाख ७६ हजार १९० रुपैयाँ भुक्तानी गरेको खुलेको छ। त्यसपछि भने उनको सेवा–सुविधा रोकिएको नगरपालिकाले जनाएको छ।
हाल थापा मानव बेचबिखनसम्बन्धी मुद्दामा प्रहरी हिरासतमा रहेका छन् भने घटनाबारे थप अनुसन्धान जारी रहेको प्रहरीले जनाएको छ।
