रामचन्द्र पौडेलले भोलि अपराह्न ४:०० बजे संघीय संसद्का दुवै सदनको संयुक्त बैठकलाई सम्बोधन गर्दै सरकारको नीति तथा कार्यक्रम प्रस्तुत गर्ने कार्यक्रम रहेको संसद् सचिवालयले जनाएको छ।
संसद् सचिवालयका प्रवक्ता एकराम गिरीका अनुसार संविधानको धारा ९५ अनुसार राष्ट्रपतिले प्रतिनिधिसभाको निर्वाचनपछिको पहिलो अधिवेशन तथा प्रत्येक वर्षको पहिलो अधिवेशन प्रारम्भ भएपछि संयुक्त बैठकलाई सम्बोधन गर्ने व्यवस्था छ।
संयुक्त बैठकअघि अपराह्न २:०० बजे प्रतिनिधिसभा र राष्ट्रियसभाका छुट्टाछुट्टै बैठक बस्नेछन्। सांसदहरूलाई संयुक्त बैठकमा सहभागी हुन अपराह्न ३:४५ बजेभित्र उपस्थित हुन आग्रह गरिएको छ।
प्रतिनिधिसभाको सम्भावित कार्यसूचीमा राष्ट्रपतिबाट अधिवेशन आह्वानसम्बन्धी पत्रबारे जानकारी, मन्त्रिपरिषद् हेरफेरसम्बन्धी सूचना, सभामुखको अनुपस्थितिमा बैठक सञ्चालन गर्ने सदस्यहरूको मनोनयन तथा प्रतिनिधिसभा नियमावलीसम्बन्धी प्रस्तावहरू पेस गरिने छन्।
त्यसैगरी सरकारले जारी गरेका ‘सार्वजनिक खरिद (दोस्रो संशोधन) अध्यादेश, २०८३’, ‘सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३’ तथा ‘संवैधानिक परिषद् (काम, कर्तव्य, अधिकार र कार्यविधि) पहिलो संशोधन अध्यादेश, २०८३’ लगायत आठ अध्यादेश संसद्मा पेस गर्ने तयारी गरेको छ।
