काठमाडौं । राष्ट्रिय स्वतन्त्र पार्टी (रास्वपा)ले सुकुमवासीको व्यवस्थित पुनर्स्थापनाका लागि सरकारलाई चैत मसान्तभित्रै काम सम्पन्न गर्न सुझाव दिएको छ।
आइतबार बसेको पार्टी सचिवालय बैठकले काठमाडौं उपत्यकाका नदी किनारमा असुरक्षित तथा अव्यवस्थित रूपमा बसोबास गरिरहेका नागरिकलाई सुरक्षित स्थानमा स्थानान्तरण गर्न सरकारलाई आग्रह गर्ने निर्णय गरेको हो।
पार्टी प्रवक्ता मनिष झाका अनुसार बाढीको जोखिम नजिकिँदै गएकाले समयमै व्यवस्थापन गर्न आवश्यक भएको हो। “केही महिनापछि बाढी आउँछ, अहिले नै सुरक्षित स्थानमा सार्ने कि फेरि समस्या आउँदा मात्र हेर्ने?” भन्ने प्रश्न उठाउँदै बैठकले योजनाबद्ध व्यवस्थापनमा जोड दिएको उनले बताए।
रास्वपाले सुकुमवासीको व्यवस्थापनका लागि अधिकार सम्पन्न प्राधिकरण गठन गर्न पनि सुझाव दिएको छ। सो प्राधिकरणमार्फत वास्तविक तथ्यांक संकलन गरी कम्तीमा ७५ प्रतिशत सुकुमवासीको व्यवस्थापन चैतभित्रै सम्पन्न गर्न सरकारलाई आग्रह गरिएको छ।
यसैबीच, प्राधिकरणले स्पष्ट लगत नदिएसम्म अन्यत्र डोजर प्रयोग नगर्नुपर्ने धारणा पनि बैठकले राखेको छ। अपचलनको उद्देश्यले अतिक्रमण गरिएका संरचना बाहेक अन्य स्थानमा तत्काल डोजर नचलाउने नीति लिनुपर्ने सुझाव रास्वपाको छ।
