मोरङ – मोरङको ग्रामथान गाउँपालिका–४ मा समाचार संकलनका क्रममा पत्रकारमाथि धम्की दिइएको घटनाप्रति अनलाइन टिभी पत्रकार संघ नेपाल (ओटिजेए) कोशी प्रदेश समितिले गम्भीर आपत्ति जनाएको छ।
संघले प्रेस विज्ञप्ति जारी गर्दै लोहन्द्रा खोलामा भइरहेको उत्खननसम्बन्धी समाचार संकलनका क्रममा खटिएका पत्रकारहरूमाथि भौतिक आक्रमणको धम्की दिइएको घटनाप्रति ध्यानाकर्षण भएको जनाएको हो।
विज्ञप्तिअनुसार वैशाख १५ गते समाचार संकलनमा खटिएका पत्रकारहरू— डुमरलाल मेहता, मोहन दकाल, सन्तोष मेहता, नगेन्द्र खड्का, प्रवेश तिम्सिना, ब्रह्मदेव महतो र दीपेन्द्रकुमार साहलाई सोही स्थानमा रिपोर्टिङ गरेर फर्कने क्रममा धम्की दिइएको उल्लेख गरिएको छ।
उक्त घटनामा गाउँपालिका अध्यक्ष नमोनारायण माझीबाट समेत धम्कीपूर्ण अभिव्यक्ति आएको भन्ने विषयप्रति संघले गम्भीर चिन्ता व्यक्त गरेको छ।
संघले पत्रकारमाथि भएको यस्तो व्यवहारलाई प्रेस स्वतन्त्रतामाथिको हस्तक्षेप भन्दै निन्दा गरेको छ। साथै घटनामा संलग्न व्यक्तिहरूलाई कानुनी दायरामा ल्याई कारबाही गर्न सम्बन्धित निकायसँग माग गरेको छ।
भविष्यमा यस्ता घटना दोहोरिन नदिन पत्रकारहरूलाई सुरक्षित रूपमा आफ्नो पेशा निर्वाह गर्न पाउने वातावरण सुनिश्चित गर्न पनि संघले आग्रह गरेको छ।
