धरान । धरानबाट अनलाइन जुवा खेल्दै गरेको अवस्थामा १० जनालाई सोमबार प्रहरीले पक्राउ गरेको छ ।
धरान उपमहानगरपालिका–१३ स्थित लक्ष्मी सडकमा रहेको मण्डला क्याफेमा अनलाइन जुवा खेल्दै र खेलाउँदै गरेका १० जनालाई प्रहरीले सोमबार राति पक्राउ गरेको हो ।
पक्राउ पर्नेहरूमा धरान–१७ का ३१ वर्षीय प्रज्वल राई, धरान–१३ का ४६ वर्षीय हेमन राई, २७ वर्षीय योगेश लिम्बू, २९ वर्षीय मिलन लिम्बू, ३१ वर्षीय शुसान्त घिमिरे, ४२ वर्षीय कुमार तामाङ, ४० वर्षीय विवेक थापा, धरान–१ का ३३ वर्षीय सुजित साह, धरान–१६ का ४१ वर्षीय अशोक लिम्बू र धरान–१५ का ३५ वर्षीय भवानी दाहाल रहेको प्रहरीले जनाएको छ ।
गोप्य सूचनाका आधारमा प्रहरी नायब निरीक्षक राधाकृष्ण दाहालको कमान्डमा खटिएको टोली तथा कोशी प्रदेश प्रहरी कार्यालय, विराटनगरबाट खटिएको टोलीले संयुक्त रूपमा छापा मारी पक्राउ गरेको इलाका प्रहरी कार्यालय धरानको प्रमुख प्रहरी नायब उपरीक्षक भीषणबाबु राईले जनाए ।
घटनास्थलबाट विभिन्न कम्पनीका १५ थान मोबाइल बरामद गरेको प्रहरीले जनाएको छ ।
