अमेरिकी प्रतिनिधिमण्डल इरानसँग शान्ति वार्ताको नयाँ चरण सुरु गर्न शनिबार इस्लामाबाद तर्फ प्रस्थान गरेको छ।इरानी सञ्चारमाध्यम इर्ना (आईआरएनए) का अनुसार इरानी प्रतिनिधिमण्डलले अमेरिकी दूतहरूसँग तत्काल प्रत्यक्ष वार्ता गर्ने कुनै योजना नरहेको जनाएको छ।
स्टिभ विटकोफ र जारेड कुश्नर इस्लामाबादका लागि प्रस्थान गरेपछि ह्वाइट हाउस ले दिएको जानकारीमा इरानी प्रतिनिधिहरूसँग ‘प्रत्यक्ष कुराकानी’ गर्ने तयारी रहेको उल्लेख गरिएको छ।
इरानका विदेशमन्त्री अब्बास अराघची ले पनि इस्लामाबाद भ्रमण गर्ने पुष्टि भएको छ। इरानी स्रोतका अनुसार उनले पाकिस्तानका सेना प्रमुख असिम मुनिर सँग भेट गरेका छन्। तेहरान स्थित दूतावासले सार्वजनिक गरेको छोटो भिडियोमा उनीहरू सँगै देखिएका छन्।ह्वाइट हाउसकी प्रेस सेक्रेटरी क्यारोलिन लेविट ले विटकोफ र कुश्नर इरानी प्रतिनिधिमण्डलका सदस्यहरूसँग प्रत्यक्ष वार्तामा संलग्न हुन पाकिस्तान प्रस्थान गरेको जानकारी दिएकी छन्।
उनका अनुसार डोनाल्ड ट्रम्प ले आह्वान गरेको प्रस्तावअनुसार इरानी पक्षले सम्पर्क गरेपछि प्रत्यक्ष कुराकानीका लागि प्रतिनिधिमण्डल पाकिस्तानतर्फ गएको हो। यो वार्ताले सम्झौताको दिशामा प्रक्रिया अगाडि बढाउने आशा गरिएको उनले बताइन्।
दुई हप्ताअघि इस्लामाबादमा भएको पहिलो चरणको वार्ताको नेतृत्व गरेका अमेरिकी उपराष्ट्रपति जेडी भान्स तत्कालका लागि वार्तामा सहभागी नहुने तर आवश्यक परेमा पाकिस्तान जान तयार रहेको बताएका छन्।इरानी पक्षले अमेरिकी प्रतिनिधिहरूसँग प्रत्यक्ष भेट गर्ने वा नगर्ने विषय अझै स्पष्ट भइसकेको छैन।
इरानको सरकारी टेलिभिजनका अनुसार अराघचीको अमेरिकीहरूसँग प्रत्यक्ष भेट्ने योजना छैन र इस्लामाबादले इरानी प्रस्तावहरू ‘सम्प्रेषण’ गर्ने पुलको रूपमा काम गर्ने बताइएको छ।
यसैबीच पाकिस्तानको विदेश मन्त्रालय ले विटकोफ र कुश्नरसँगको प्रत्यक्ष वार्ताबारे उल्लेख नगरी अराघची इस्लामाबाद पुगेको र पाकिस्तानी अधिकारीहरूसँग ‘क्षेत्रीय शान्ति र स्थिरता’ सम्बन्धी विषयमा छलफल गर्ने जनाएको छ।
(एएफपी)
