कानुनअनुसार रोजगारदाता र श्रमिकबीच सेवा, सर्त तथा सुविधा सम्बन्धी रोजगार सम्झौता अनिवार्य रूपमा गर्नुपर्ने व्यवस्था छ। सम्झौता भएपछि मात्र श्रमिकलाई काममा लगाउन पाइने र नियुक्तिपत्र समेत सोही प्रक्रियाअन्तर्गत पर्ने स्पष्ट गरिएको छ।
विज्ञप्तिमा प्रशिक्षार्थीलाई दैनिक ८ घण्टा र साप्ताहिक ४८ घण्टाभन्दा बढी काममा लगाउन नपाइने तथा अन्य श्रमिकलाई पनि कानुनले तोकेको समयसीमाभन्दा बढी काम गराउन नहुने उल्लेख छ।
त्यस्तै, अतिरिक्त समय (ओभरटाइम) काम गराउँदा पनि कानुनी प्रावधानअनुसार सीमित घण्टामात्र काम लगाउन पाइने व्यवस्था रहेको मन्त्रालयले स्मरण गराएको छ।
मन्त्रालयका अनुसार केही अस्पताल तथा स्वास्थ्य संस्थामा कार्यरत चिकित्सक, स्वास्थ्यकर्मी, नर्सिङ स्टाफ तथा अन्य कर्मचारीलाई नियमविपरीत काममा लगाइएको र तोकिएको भन्दा बढी समय काम गराइएको भन्ने उजुरी प्राप्त भएका छन्।
यसप्रति गम्भीर ध्यानाकर्षण जनाउँदै मन्त्रालयले सबै रोजगारदाता र श्रमिकलाई प्रचलित श्रम कानुनको पूर्ण पालना गर्न आग्रह गरेको छ। साथै, कानुन विपरीत कार्य गरेको पाइए श्रम ऐन २०७४ बमोजिम कडा कारबाही गरिने चेतावनी दिएको छ।
