प्यूठान – प्यूठानमा मध्यराति भएको भीषण आगलागीमा १३ वटा घर तथा गोठ जलेर नष्ट भएका छन् भने ८९ वटा चौपाया मरेका छन्।
जिल्ला प्रहरीका अनुसार ऐरावती गाउँपालिका–१ छेडाघाटमा स्थानीय लक्ष्मण रानाको फुसले छाएको कच्ची गोठबाट आगो सल्किएर बस्तीमा फैलिएको थियो। राति करिब पौने १२ बजेतिर सुरु भएको आगो बिहान करिब ७ बजेमात्र नियन्त्रणमा आएको थियो।
आगलागीबाट विभिन्न परिवारका घर, गोठ, लत्ताकपडा, खाद्यान्न, भाँडावर्तन, नगद तथा सुनसमेत जलेर नष्ट भएका छन्। घटनामा ८२ वटा बाख्रा, ९ वटा गोरु तथा अन्य चौपाया जलेर मरेका छन् भने केही जनावर घाइते भएका छन्।
स्थानीय देवानसिंह राना, विकास राना, लक्ष्मण राना, इश्वरी राना, रमेश घर्ती, ओमबहादुर रेश्मी मगर, भुपाल रोका, गुमा रजाली, बलबहादुर रजाली, झबिन्द्र रजाली, घनबहादुर राना, देवबहादुर रजाली र डिला रजालीका घर तथा गोठमा ठूलो क्षति पुगेको प्रहरीले जनाएको छ।
आगलागीबाट करिब ९३ लाखभन्दा बढी बराबरको धनमाल जलेर नष्ट भएको हरि भट्टराई ले जानकारी दिएका छन्।
इलाका प्रहरी कार्यालय बिजुवार, प्रहरी चौकी दाङवाङ, जिल्ला प्रहरी कार्यालय प्यूठान, नेपाली सेना, सशस्त्र प्रहरी बल तथा स्थानीयवासीको सहयोगमा आगो नियन्त्रणमा लिइएको थियो।
प्रहरीका अनुसार गोठ खाली अवस्थामा रहेको भए पनि आगलागीको वास्तविक कारण भने खुल्न सकेको छैन।
