इरानसँगको युद्ध चर्किरहेका बेला अमेरिकी रक्षा मन्त्री पिट हेगसेथले सेना प्रमुख जनरल र्यान्डी जर्जलाई पदबाट हटाएका छन्। उनलाई राजीनामा दिन र तत्काल अवकाश लिन निर्देशन दिएपछि यो कदम चालिएको हो।
रक्षा मन्त्रालयका प्रवक्ता सीन पार्नेलले विज्ञप्ति जारी गर्दै जनरल जर्जले ४१औँ सेना प्रमुखको रूपमा तत्काल लागू हुने गरी अवकाश लिएको जानकारी दिएका छन्। उनले जर्जको दशकौँ लामो सेवाप्रति कृतज्ञता व्यक्त गर्दै सुखद अवकाशको कामना समेत गरेका छन्।
इरानसँगको युद्ध सुरु भएको एक महिनाभन्दा बढी समयपछि गरिएको यो निर्णयलाई विशेष रूपमा हेरिएको छ। अमेरिकी सेनाले सम्भावित जमिनी आक्रमणका लागि हजारौँ सैनिक मध्यपूर्व पठाइरहेको संवेदनशील अवस्थामा यस्तो नेतृत्व परिवर्तन असामान्य मानिन्छ।
सन् २०२३ मा तत्कालीन राष्ट्रपति जो बाइडेनले नियुक्त गरेका जर्जको कार्यकाल २०२७ सम्म रहने थियो। तर हेगसेथले रक्षा मन्त्रालय सम्हालेयता सैन्य नेतृत्वमा भइरहेको व्यापक फेरबदलका क्रममा उनी पनि हटाइएका हुन्।
जर्जसँगै जनरल डेभिड होड्ने र मेजर जनरल विलियम ग्रीनलाई पनि पदबाट हटाइएको छ। यसअघि पनि हेगसेथले जोइन्ट चिफ्स अफ स्टाफका अध्यक्ष जनरल सीक्यू ब्राउन र नौसेना प्रमुख एडमिरल लिसा फ्रान्चेट्टीलाई बर्खास्त गरिसकेका थिए। अब जर्जको स्थानमा उप-प्रमुख जनरल क्रिस्टोफर लानेभले कार्यवाहक सेना प्रमुखको जिम्मेवारी सम्हाल्ने भएका छन्। रक्षा अधिकारीहरूका अनुसार यो प्रक्रिया सामान्य र अपेक्षित हो।
अनुभवी पैदल फौज अधिकारी जर्जले इराक र अफगानिस्तान युद्धमा नेतृत्व गरेका थिए। उनले सेना भर्ना संकट समाधान र ड्रोनजस्ता आधुनिक हतियारमा जोड दिएका थिए। तर उनको बर्खास्तीको आधिकारिक कारण भने खुलाइएको छैन।
विश्लेषकहरूका अनुसार ट्रम्प प्रशासनको दृष्टिकोणअनुसार सेनाको पुनर्संरचना गर्ने प्रयासका बीच पेन्टागनमा निरन्तर नेतृत्व परिवर्तन भइरहेको देखिन्छ।
