काठमाडौं – भदौ २३ गतेको जेन–जी आन्दोलनमा भएको दमनपछि १९ युवाको मृत्यु भएको घटनापछि २४ भदौमा देशभर आगजनी, तोडफोड र लुटपाटका घटना भएका थिए। उक्त घटनामा संलग्न व्यक्तिहरूमाथि प्रहरीले व्यापक कारबाही गरेको जनाएको छ।
नेपाल प्रहरीका अनुसार आन्दोलनको आवरणमा भएका विभिन्न अपराधमा १२ चैतसम्म ९४९ जनालाई पक्राउ गरिएको छ। प्रहरी प्रवक्ता अबिनारायण काफ्लेका अनुसार ती घटनासम्बन्धी ७८७ वटा मुद्दा दर्ता भएका छन्, जसमध्ये ६५८ मुद्दा फर्स्योट भइसकेका छन् भने १२९ अझै अनुसन्धानकै क्रममा छन्।
पक्राउ परेकामध्ये २०७ जना पुर्पक्षका लागि थुनामा रहेका छन् भने ४७० जना धरौटीमा, २४३ जना हाजिरी–जमानीमा र २१ जना साधारण तारेखमा छुटेका छन्। हाल आठ जना हिरासतमा रहेको प्रहरीले जनाएको छ।
प्रहरीले सर्वोच्च अदालतमा आगजनीदेखि नेताहरूका घरमा लुटपाट गर्ने, सार्वजनिक तथा निजी सम्पत्तिमा क्षति पुर्याउने, प्रहरीमाथि आक्रमण गर्ने तथा हतियार लुट्ने घटनामा संलग्न व्यक्तिहरूमाथि कारबाही गरिएको जनाएको छ। उनीहरूमाथि ज्यान मार्ने उद्योग, आपराधिक उपद्रव, नैतिकताविरुद्धका कसुरलगायत मुद्दा दायर गरिएको छ।
यता, सरकारले २४ भदौका घटनाको छानबिनका लागि उच्चस्तरीय समिति गठन गर्ने निर्णय गरेको छ। शुक्रबार बसेको मन्त्रिपरिषद् बैठकले एक साताभित्र समिति गठन गरी घटनाको सम्पूर्ण विवरण संकलन, विश्लेषण तथा जिम्मेवार पक्ष पहिचान गर्न निर्देशन दिएको छ।
