वाशिङ्टन – अमेरिकी राष्ट्रपति डोनाल्ड ट्रम्पले इरान लाई ४८ घण्टाभित्र होर्मुज जलमार्ग नखोले गम्भीर सैन्य कारबाही गर्ने चेतावनी दिएका छन्।
विश्वव्यापी तेल आपूर्तिको प्रमुख मार्ग मानिने होर्मुज जलमार्ग इरानले अवरुद्ध गरेपछि ट्रम्पले कडा प्रतिक्रिया जनाएका हुन्। उनले जलमार्ग तुरुन्तै खुला नगरे अमेरिकाले इरानका विभिन्न विद्युत् केन्द्रहरूमा आक्रमण गरी ध्वस्त पार्ने चेतावनी दिएका छन्।
यसैबीच, इरानले डिमोना क्षेत्रमा क्षेप्यास्त्र आक्रमण गरेको छ, जसमा कम्तीमा ४७ जना घाइते भएका छन्। उक्त आक्रमण डिमोनास्थित आणविक केन्द्र लक्षित रहेको बताइएको छ।इजरायली सञ्चारमाध्यमका अनुसार नजिकैको अराद क्षेत्रमा समेत ठूलो क्षति पुगेको छ। इजरायली प्रधानमन्त्री बेन्जामिन नेतन्याहु ले घटनालाई ‘अत्यन्तै कठिन अवस्था’को संज्ञा दिएका छन्।
इरानले भने यो आक्रमण आफ्नो नातान्ज आणविक केन्द्र माथि भएको हमलाको जवाफ भएको दाबी गरेको छ।अमेरिकी सेन्ट्रल कमान्डका अनुसार हालै गरिएको अमेरिकी बमबारीपछि इरानको सामुद्रिक क्षमतामा केही कमी आएको भए पनि खाडी क्षेत्रमा तनाव अझै जारी छ।
यसै क्रममा जी-७ राष्ट्रका विदेश मन्त्रीहरूले तत्काल आक्रमण रोक्न र विश्वव्यापी ऊर्जा आपूर्ति सुरक्षित गर्न आह्वान गरेका छन्।
द्वन्द्व चर्किँदै जाँदा क्षेत्रीय तनाव बढिरहेको छ भने इरानमा नयाँ वर्षको उत्सवसमेत प्रभावित भएको बताइएको छ।
