काठमाडौं — पाकिस्तानले अफगानिस्तान माथि पुनः हवाई आक्रमण गरेको छ। स्थानीय सञ्चारमाध्यमका अनुसार पाकिस्तानी लडाकु विमानले राजधानी काबुलका विभिन्न स्थानमा बम प्रहार गरेका छन्, जसमा एक अस्पताल समेत परेको बताइएको छ।
आक्रमणमा करिब ४ सय जनाको मृत्यु भएको र २५० भन्दा बढी घाइते भएको जनाइएको छ। दारुलअमान, अरजान किमत, खैरखाना तथा काबुल अन्तर्राष्ट्रिय विमानस्थल आसपासका क्षेत्रमा विस्फोट र गोलीबारीको आवाज सुनिएको थियो।
तालिबान सरकारका प्रवक्ता जबीहुल्लाह मुजाहिदले पाकिस्तानी सेनाले काबुलस्थित नशा मुक्ति केन्द्रमा बम खसालेको आरोप लगाएका छन्। तालिबानले घटनाको कडा निन्दा गर्दै यसलाई मानवताविरुद्धको अपराध भनेको छ।
यता शहबाज शरीफ का प्रवक्ता मोशर्रफ जैदीले आरोप अस्वीकार गर्दै अस्पताललाई निशाना नबनाइएको दाबी गरेका छन्।
यस घटनापछि राशिद खानले कडा आलोचना गर्दै अन्तर्राष्ट्रिय समुदायसँग छानबिनको माग गरेका छन्।
हाल पाकिस्तान र अफगानिस्तानबीच तनाव बढ्दै गएको छ र सीमा क्षेत्रमा पटक–पटक झडप भइरहेको छ।
