काठमाडौं । सर्वोच्च अदालतमा दायर भएको प्रतिनिधिसभा पुनःस्थापनासम्बन्धी रिट छिटो अगाडि बढाउन नेपाली कांग्रेसका निवर्तमान सांसदहरूले प्रधानन्यायाधीश प्रकाशमानसिंह राउतको ध्यानाकर्षण गराउने भएका छन्। यसका लागि उनीहरू बिहीबार डेलिगेसनसहित सर्वोच्च अदालत जाने भएका हुन्।
विघटित प्रतिनिधिसभामा नेपाली कांग्रेसका प्रमुख सचेतक रहेका श्यामकुमार घिमिरेको नेतृत्वमा पूर्वसांसदहरूको टोली रिट छिटो अगाडि बढाउन आग्रह गर्न प्रधानन्यायाधीश राउतसँग भेट्न लागेको हो। यसका लागि बिहीबार बिहान ११ बजे समय लिइसकेको घिमिरेले जानकारी दिए।
‘१७ भन्दा बढी रिट संसद् पुनःस्थापनाको माग गर्दै दायर भइसकेका छन्। तर सर्वोच्च अदालतले अहिलेसम्म ती रिटहरूको पेसी तोकेको छैन,’ घिमिरेले लोकान्तरसँग भने, ‘रिट दायर भएपछि त्यसलाई टुंग्याउनुपर्छ। पेसी तोकिदिन र सुनुवाइ गरिदिन आग्रह गर्न जान लागेका हौं।’
एमाले पनि यसमा सहभागी हुने हो कि भन्ने लोकान्तरको प्रश्नमा उनले त्यसबारे टुंगो नलागेको बताए।
‘मैले महेश बस्नेतलाई (विघटित प्रतिनिधिसभामा एमालेका मुख्य सचेतक) कुरा गरेको थिएँ। उहाँ अहिले निर्वाचन लड्ने क्षेत्रमा हुनुहुन्छ,’ उनले भने, ‘एमालेबाट औपचारिक टुंगो आएको छैन।’
कांग्रेसका ६५ जना निवर्तमान सांसदले संसद् पुनःस्थापनाका लागि रिट दायर गरेका छन्। तीमध्ये काठमाडौंमा उपलब्ध सबै सांसदहरू बिहीबार सर्वोच्च अदालत जाने घिमिरेले बताए।
