काठमाडौं । राष्ट्रिय स्वतन्त्र पार्टी (रास्वपा) का पूर्वसांसद ढाकाकुमार श्रेष्ठ श्रम संस्कृति पार्टीमा प्रवेश गरेका छन्। मंगलबार पार्टी अध्यक्ष हर्क साम्पाङले उनलाई पार्टीमा स्वागत गरेका हुन्।
श्रेष्ठलाई स्वागत गर्दै अध्यक्ष साम्पाङले सामाजिक सञ्जाल फेसबुकमा लेखेका छन्, “ढाकाकुमार श्रेष्ठज्यूलाई श्रम संस्कृतिमा स्वागत छ। अब लागौं है त।”
केही वर्षअघि रास्वपाबाट समानुपातिक सांसद रहेका श्रेष्ठ स्वास्थ्य मन्त्री बन्ने नाममा व्यवसायी दुर्गा प्रसाईंसँग दुई करोड रुपैयाँ मागेको अडियो सार्वजनिक भएपछि विवादमा परेका थिए। उक्त अडियो सार्वजनिक भएसँगै रास्वपाले उनलाई अनुशासन उल्लङ्घनको आरोपमा पार्टीबाट निष्कासन गरेको थियो।
यसअघि कास्की प्रहरीले प्रतिबन्धित औषधि ट्रामाडोल बिक्री गरेको आरोपमा श्रेष्ठलाई पक्राउसमेत गरेको थियो। सो घटनामा उनी ७५ हजार रुपैयाँ धरौटी बुझाएर रिहा भएका थिए।
