काठमाडौं – आगामी फागुन २१ गते हुने प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीतर्फको मतपत्र छपाइ कार्य सम्पन्न भएको छ।
निर्वाचन आयोगका अनुसार जनक शिक्षा सामग्री केन्द्र लिमिटेड, सानोठिमीमा समानुपातिकतर्फ दुई करोड आठ लाख ५० हजार प्रति मतपत्र छपाइ सोमबार सम्पन्न गरिएको हो।
केन्द्रका प्रबन्ध निर्देशक यदुनाथ पौडेलले समानुपातिक प्रणालीका लागि आवश्यक मतपत्र छपाइ पूरा भएसँगै प्रत्यक्षतर्फको मतपत्र छपाइ कार्य सुरु गरिएको जानकारी दिए। उनका अनुसार केन्द्रले सोमबारदेखि प्रत्यक्ष निर्वाचन प्रणालीतर्फको मतपत्र छपाइ सुरु गरेको छ।
यसअघि केन्द्रले १० लाख ९८ हजार २०० प्रति नमुना मतपत्र छपाइ गरी निर्वाचन आयोगलाई पठाइसकेको थियो। ती नमुना मतपत्र मतदाता सचेतना लगायत विभिन्न प्रयोजनका लागि प्रयोग भइरहेका छन्।
निर्वाचन आयोगले तोकिएको समयभित्र मतपत्र छपाइ सम्पन्न गर्ने लक्ष्यअनुसार काम अघि बढिरहेको जनाएको छ।
