मोरङ – एसियाली राष्ट्रहरूलाई सडक सञ्जालमार्फत जोड्ने उद्देश्यसहित अघि बढाइएको ‘एसियन हाइवे’ अन्तर्गत काँकरभिट्टाबाट लौकहीसम्मको सडक स्तरोन्नति काम दुई वर्ष बितिसक्दा करिब ३५ प्रतिशत मात्रै सम्पन्न भएको छ।
आयोजनाअन्तर्गत झापाको पाडाजुगीदेखि पश्चिम खण्डमा आइतबारबाट पहिलो चरणको एकलेन कालोपत्र सुरु गरिएको छ। पश्चिम खण्ड इटहरी कार्यालयका प्रमुख जगत प्रजापतिका अनुसार निर्माण सम्झौता भएको दुई वर्षमा कुल ३५ प्रतिशत प्रगति भएको हो।
एसियन राजमार्ग नम्बर–२ अन्तर्गत काँकरभिट्टाबाट लौकहीसम्म १२० किलोमिटर सडक स्तरोन्नति गर्ने लक्ष्य रहे पनि हाल ९५ दशमलव ७६ किलोमिटर सडकमा मात्रै ठेक्का लागेर काम भइरहेको छ। आयोजना पूर्वी खण्ड र पश्चिम खण्ड गरी दुई भागमा विभाजन गरेर निर्माण भइरहेको छ।
हालसम्म दुवै खण्डमा गरी करिब २० किलोमिटर सडकमा एकतर्फी पहिलो चरणको कालोपत्र सम्पन्न भएको छ। आयोजना पूर्वी खण्ड दमक कार्यालयका प्रमुख सुनीलबाबु पन्तका अनुसार पूर्वी खण्डमा पनि करिब ३५ प्रतिशत काम पूरा भएको छ।
निर्माण सामग्री सहज रूपमा उपलब्ध भएमा आगामी दिनमा कामले तीव्रता पाउने पन्तले बताए। उनका अनुसार पूर्वी खण्डमा बिजुलीका खम्बा सार्ने काम करिब ८० प्रतिशत सम्पन्न भइसकेको छ भने पश्चिम खण्डमा ४० प्रतिशत मात्रै सम्पन्न भएको छ। बजार क्षेत्रका खम्बा सार्न अझै बाँकी रहेको आयोजनाले जनाएको छ।
ठूला पुल निर्माणतर्फ पूर्वी खण्डमा २३ प्रतिशत र पश्चिम खण्डमा २५ प्रतिशत प्रगति भएको आयोजनाको कार्यालयले जानकारी दिएको छ।
एशियाली विकास बैंकको आर्थिक सहयोगमा विसं २०८० माघ १९ गतेदेखि सुरु भएको यस आयोजनालाई तीन वर्षभित्र सम्पन्न गर्ने लक्ष्य राखिएको छ। आयोजनामा करिब ३० करोड अमेरिकी डलर लागत अनुमान गरिएको छ।
एसियन हाइवे थाइल्याण्डको बैंककबाट सुरु भई म्यान्मा, बंगलादेश, भारत हुँदै नेपालको काँकरभिट्टाबाट प्रवेश गरी पूर्व–पश्चिम राजमार्गमार्फत भारतको दिल्ली हुँदै पाकिस्तानको कराँचीसम्म पुग्नेछ।
तीन वर्गमा निर्माण हुने उक्त सडक बजार क्षेत्रमा ५० मिटर, ग्रामीण क्षेत्रमा ३३ मिटर र जङ्गल क्षेत्रमा २४ मिटर चौडाइको हुनेछ।
