काठमाडौँ। सरकारी ढुकुटीको रकम नतिरी बसेकाहरूका लागि महालेखा नियन्त्रक कार्यालयले कडा चेतावनी जारी गरेको छ। पटक–पटक सूचना दिइए पनि बेवास्ता गर्नेहरूका लागि अब ऋणीहरूको चल–अचल सम्पत्ति रोक्का गरी असुल गर्ने प्रक्रिया अघि बढाइने भएको छ।
बबरमहलस्थित कार्यालयले सार्वजनिक सूचना जारी गर्दै सरकारी बाँकी रकम तिर्न बाँकी रहेका व्यक्तिहरूको तीन–पुस्ते विवरण समेत सार्वजनिक गरेको छ। यसअघि पनि वेबसाइटमार्फत नाम सार्वजनिक गरी उपस्थित हुन आग्रह गरिएको थियो, तर ऋणीहरूले कुनै प्रतिक्रिया नदिएपछि कार्यालय कडा रूपमा अघि बढेको हो।
सूचनामा भनिएको छ कि अबको ३५ दिनभित्र सम्पर्कमा नआए र आफ्नो बाँकी रकम तथा नियमानुसारको ब्याज नतिरे कानुन अनुसार सम्बन्धित व्यक्तिको सम्पत्ति दाबी गरिनेछ। साथै, यस क्रममा आर्थिक वा सामाजिक प्रतिष्ठामा पुग्ने कुनै पनि क्षतिका लागि कार्यालय जिम्मेवार नहुने पनि स्पष्ट पारिएको छ।
सरकारी बक्यौता लामो समयदेखि तिर्नेहरूको सूची बढ्दै गएपछि सरकारले कडाइ सुरु गरेको देखिन्छ। तोकिएको समयभित्र फरफारक नगर्नेहरूको हकमा कानुनी कारबाहीको प्रक्रिया तत्काल अघि बढाइने कार्यालयले जनाएको छ।
