धनगढी। नेपालमा जेनजी विद्रोहपछि गठन भएको नेपाली कम्युनिस्ट पार्टी निकट सङ्गठन ‘रेड फोर्स नेपाल’ले युवा नेता पवन सुनारलाई केन्द्रीय चुनाव परिचालन समितिको संयोजक (कमान्डर) को महत्त्वपूर्ण जिम्मेवारी सुम्पिएको छ। सङ्गठनले आगामी फागुन २१ गते हुने निर्वाचनलाई लक्षित गर्दै सुनारलाई केन्द्रीय चुनावी कमान्डरमा मनोनीत गरेको हो।
‘रेड फोर्स नेपाल’को केन्द्रीय कमिटीले शनिबार गरेको निर्णयअनुसार यसअघि प्रदेश संयोजकको जिम्मेवारी सम्हालिसकेका सुनारलाई पदोन्नति गर्दै केन्द्रीय तहको चुनावी कमान्डको जिम्मेवारी दिइएको हो। सङ्गठनले निर्वाचनमा युवाशक्तिको प्रभावकारी परिचालनका लागि अनुभवी र सक्रिय नेतृत्व आवश्यक ठानेर यो निर्णय गरेको जनाएको छ।
सुदूरपश्चिम प्रदेशको कैलाली जिल्लामा बलियो सङ्गठनात्मक पकड बनाएका सुनार विद्यार्थी राजनीतिबाट उदाएका जुझारु युवा नेता हुन्। उनले सुदूरपश्चिमकै ठुलो शैक्षिक केन्द्र मानिने कैलाली बहुमुखी क्याम्पसको इकाइ कमिटीबाट साङ्गठनिक राजनीति सुरु गरेका थिए। त्यसपछि नगर कमिटी हुँदै कैलाली जिल्लाको नेतृत्व सम्हाल्दै उनी सङ्गठन निर्माणमा खारिँदै आएका छन्।
लामो समयदेखि विद्यार्थी आन्दोलन तथा युवाका हकहितका सवालमा सडक र सदन दुवै माध्यमबाट सक्रिय भूमिका निर्वाह गर्दै आएका सुनारलाई सङ्गठनभित्र प्रभावशाली युवा नेताका रूपमा लिइन्छ।
केन्द्रीय चुनावी कमान्डरको जिम्मेवारी सम्हाले लगत्तै सुनारले आफू देशैभरको चुनावी मोर्चा सम्हाल्न तयार रहेको बताएका छन्। उनले आगामी निर्वाचनमा देशका १६५ वटै निर्वाचन क्षेत्रमा ‘रेड फोर्स नेपाल’को सञ्जाललाई आक्रामक र व्यवस्थित रूपमा परिचालन गर्ने रणनीति सार्वजनिक गरेका छन्।
“म १६५ निर्वाचन क्षेत्रको चुनावी कमान्डर हुँ। सिङ्गो देशको चुनावी कमान्ड सम्हाल्दै पार्टीलाई विजय गराउन कुनै कसर बाँकी राख्ने छैन,” उनले भने।
सुनारले आवश्यकता अनुसार नवयुवा, सक्षम तथा योग्य विद्यार्थीहरूलाई देशभरका निर्वाचन क्षेत्रमा परिचालन गर्ने प्रतिबद्धता व्यक्त गर्दै युवाको जोस, जाँगर र सङ्गठनात्मक शक्तिलाई पार्टीको मुख्य आधार बनाएर आगामी निर्वाचनमा नतिजा आफ्नो पक्षमा पार्ने दाबी गरेका छन्।
