चितवन। बजारमा अण्डाको माग बढ्दै गएसँगै यसको मूल्य पनि क्रमिक रूपमा बढ्न थालेको छ। नेपाल लेयर्स कुखुरापालक सङ्घले आइतबारदेखि लागू हुने गरी अण्डाको मूल्य वृद्धि गरेको हो।
सङ्घका अनुसार अब ठूलो अण्डा एक क्रेट (३० वटा)को फार्म मूल्य ४९५ रुपैयाँ कायम गरिएको छ। यसअघि ४६५ रुपैयाँमा बिक्री हुँदै आएको ठूलो अण्डाको मूल्य ३० रुपैयाँले बढाइएको हो। यस्तै, मझौला अण्डाको फार्म मूल्य ४७५ रुपैयाँ निर्धारण गरिएको छ, जुन यसअघि ४४५ रुपैयाँ थियो।
यसअघि गत मङ्सिर महिनामा अण्डाको मूल्य हालसम्मकै उच्च विन्दुमा पुगेको थियो। सो समयमा ठूलो अण्डा प्रतिक्रेट ५६५ रुपैयाँ र मझौला अण्डा ५५० रुपैयाँमा बिक्री भएको थियो।
नेपाल लेयर्स कुखुरापालक सङ्घका अध्यक्ष विनोद पोखरेलका अनुसार देशमा निर्वाचनको माहोल बन्नु, निर्वाचनसँगै सीमा क्षेत्रमा गरिएको कडाइ तथा आपूर्तिमा आएको प्रभावका कारण अण्डाको मूल्य बढेको हो।
उनका अनुसार अण्डा उत्पादन गर्ने कुखुराको सङ्ख्या घट्नु, उत्पादनमा कमी आउनु र बन्द रहेका विद्यालयहरू खुल्न थालेपछि माग बढ्नुले पनि मूल्यमा क्रमिक सुधार देखिएको छ।
सङ्घका अनुसार अण्डाको उत्पादन लागत प्रतिगोटा १९ रुपैयाँ १२ पैसा पर्न आउँछ। यसअनुसार किसानको लागत मूल्य प्रतिक्रेट ५७४ रुपैयाँ ६ पैसा पर्न जान्छ। यसअघि लागत मूल्य नजिक पुगेको अवस्थामा पुनः अण्डाको मूल्य घट्दा किसान निरास बनेका थिए।
हाल मूल्य बढ्ने संकेत देखिएपछि किसान आशावादी बनेका छन्। सङ्घले बजारको अवस्था हेरेर अण्डाको समर्थन मूल्य निर्धारण गर्दै आएको जनाएको छ।
