बेलबारी । मोरङको बेलबारी नगरपालिकाले असार १० गते मंगलबार आर्थिक वर्ष २०८२।८३ को बजेट सार्वजनिक गर्यो ।
तर सोही बजेटका बिषयमा छलफल र पास नहुँदै नगरपालिकाभित्र नयाँ खिचडी पाकिरहेको विषय सार्वजनिक भएको छ ।
केही दिनअघि बेलबारी नगरपालिकाकी उपप्रमुख नितु थापा (कोइलाला) ले नगरपालिकाले विभिन्न शीर्षकहरूमा भइरहेको बजेट हेर्न पाउनुपर्ने माग गरिन् ।
उनले लेखा प्रमुख तथा तत्कालीन निमित्त प्रमुख प्रशासकीय अधिकृत धनमाया राईलाई केही शीर्षक र केही कर्मचारीहरूले लिइरहेको विभिन्न शीर्षकको भत्ता रकमको जानकारी मागेकी थिइन् ।
तर, लेखा प्रमुख राईले त्यसरी हिसाब हेर्न नमिल्ने र गोपनीयता भंग हुने भन्दै हिसाब देखाउन नमानेपछि उपप्रमुख कोइरालालाई विभिन्न शीर्षकमा छुटि्टएको बजेटको लिष्ट दिएकी थिइन् ।
सोही लिष्ट मागेको नभई केही खर्चका शीर्षकहरूमा भएका खर्चको विवरण माग गरेको उनले बताएपछि हिसाब देखाउन नमिल्ने बताएकी थिइन् ।
उपप्रमुख कोइरालाले आफु अनुगमन समितिको संयोजक समेत रहेको र नगरपालिकाले गरिरहेको खर्चको विवरण माग गर्दा उल्टै दिन नमिल्ने भन्दै लेखा प्रमुख पन्छिएको बताएकी छिन् ।
उनले यो कस्तो हिसाब हो, जुन नगरपालिकाको उपप्रमुखले माग्दा समेत कर्मचारीले देखाउँदा हेर्न मिल्दैन भन्ने प्रश्न गरिन् ।
केही शीर्षकहरूमा भइरहेको खर्च अस्वभाविक भएको गुनासो समेत आएपछि आफूले हिसाब हेर्न खोजेको उनको दाबी छ ।
यता लेखा प्रमुख राईले हरेक महिनाको हिसाब सार्बजनिक गर्ने गरेको र उपप्रमुखलाई समेत मागेको र दिन मिल्ने हिसाब दिएको बताएकी छन् ।
तथापि, गोपनीयतालाई समेत मध्यनजर गर्दै ब्यक्तिगत र कतिपय हिसाब दिन नमिल्ने भएका कारण नदिएको उनले बताएकी छिन् ।
उनले आन्तरिक लेखा परीक्षक र महालेखा परीक्षकले समेत हिसाब हेर्दा विभागको पत्र लिएर आउने गरेको र कसैले ब्यक्तिगत रूपमा हिसाब हेर्न माग्दा दिन नमिल्ने बताएकी छिन् ।
उनले आफूलाई थाहा भएसम्म हिसाब हेर्न सबैलाई अधिकार नभएका कारण हिसाब हेर्न नदिएको तर प्रमुख प्रशासकीय अधिकृतले हिसाब हेर्न दिनु भनेको खण्डमा हिसाब हेर्न दिने बताइन् ।
उपप्रमुख कोइरालाले भने हिसाब देखाउन नमान्नु शंकास्पद भएको र यस विषयमा कुरा राख्दा नगरप्रमुख दिलप्रसाद राई समेत मौन रहेको आरोप लगाएकी छन् ।
उनले नगरपालिकाको उपप्रमुखले हिसाब हेर्न माग्दा हिसाब दिन नमिल्ने यो कस्तो नियम हो ? भन्दै प्रतिप्रश्न समेत गरिन् ।
