विराटनगर । मोरङको विराटनगर महानगरपालिका–३ बुद्धचोकस्थित बुद्धोदय बचत तथा ऋण सहकारी संस्थाले आफ्ना महिला शेयर सदस्यहरूलाई लक्षित गरी विषादिमुक्त भान्सा अभियान कार्यक्रम सञ्चालन गरेको छ ।
आफ्ना महिला शेयर सदस्यहरूलाई लक्षित गरी शुक्रबारदेखि सुरु भएको तीन दिने विषादिमुक्त भान्सा अभियान कार्यक्रम आइतबार (आज) समापन भएको हो ।
सहकारीको सभाहलमा भएको कार्यक्रममा बुद्धोदयका ६० जना महिला सदस्यहरूको सहभागिता रहेको आयोजक संस्थाका कोषाध्यक्ष यज्ञप्रसाद खतिवडाले जानकारी दिए ।
यसैगरी, अध्यक्ष राजेन्द्रप्रसाद खनालले कार्यक्रमको संयोजन आयोजक संस्था बुद्धोदय साकोसका महिला परिचालन उपसमितिका संयोजक सीता खड्काले गरेको बताए ।
विराटनगर–३ का वडाध्यक्ष बासुबहादुर बस्नेतको प्रमुख आतिथ्यतामा सम्पन्न भएको समापन कार्यक्रममा बोल्दै वक्ताहरूले यस्ता अभियान पछिल्लो समय निकै आवश्यक रहेको बताए ।
अध्यक्ष खनालले यसको प्रभाव र औचित्यका बारेमा प्रष्ट्याएका थिए ।
शेयर सदस्य र समाजको स्वास्थ्यमा समेत परिवर्तन ल्याउन विषादिमुक्त साग–तरकारी उत्पादनले टेवा दिन्छ भने अर्कोतर्फ फुर्सदको समय सदुपयोग गरी आर्थिक पक्षलाई पनि सुदृढ गराउने विषय पनि उठान भएको उनले धारणा व्यक्त गरे ।
सहकारीले नागरिक सचेतना र समाज परिवर्तनमा सहकारीकर्मीसँगै शेयर सदस्य संस्थाको नेतृत्व र आर्थिक पक्षमा सचेत हुने हो भने सहकारीका नाममा ठगी गर्ने परम्परासमेत अन्त्य हुने उनको भनाइ छ ।
यता, कार्यक्रममा सहभागी महिला शेयर सदस्य सावित्रा थापाले सबै महिला सदस्यहरू प्रतिबद्ध भई उत्पादनमा जोडिने विषयमा आफू विश्वस्त रहेको सुनाइन् ।
