वासिङटन — अमेरिकी राष्ट्रपति डोनाल्ड ट्रम्प प्रशासनले क्युबा, हाइटी, निकारागुआ र भेनेजुएलाका पाँच लाखभन्दा बढी आप्रवासीहरूको अमेरिकामा बसोबास गर्न पाउने अस्थायी कानुनी मान्यता खारेज गर्ने बताएको छ । अमेरिकी संघीय सरकारले सूचना जारी गर्दै ती आप्रवासीहरूलाई आगामी २४ अप्रिलमा उनीहरूको बसोबास अनुमतिपत्र रद्द हुनुअघि नै देश छाड्न चेतावनी दिइएको सीबीएस न्युजले जनाएको छ ।
ती देशका ५ लाख ३० हजार अमेरिकी पूर्वराष्ट्रपति जो बाइडनको कार्यकालमा ‘सीएचएनभी’ आप्रवासन योजनाअन्तर्गत अमेरिका प्रवेश गर्न दिइएको थियो । तर तीमध्ये कति आप्रवासीले यस अवधिमा अमेरिकामा स्थायी रूपमा बस्न पाउने अनुमति पाउन सफल भएका छन् भन्ने स्पष्ट छैन ।
‘सीएचएनभी’ अर्थात क्युबा, हाइटी, निकारागुआ र भेनेजुएला भनिने उक्त कार्यक्रम सन् २०२२ मा डेमोक्रेटिक राष्ट्रपति बाइडेनको नेतृत्वमा सुरू गरिएक थियो । सुरूमा भेनेजुएलाका मानिसहरूका लागि ल्याइएको कार्यक्रम पछि अन्य देशहरूमा विस्तार गरिएको थियो । यसअन्तर्गत अमेरिकी प्रायोजकहरू भएका ती चार देशका आप्रवासी र उनीहरूका नजिकका परिवारका सदस्यहरूलाई अमेरिकामा उडान गर्न र प्यारोल भनेर चिनिने अस्थायी आप्रवासन स्थिति अन्तर्गत दुई वर्षसम्म रहन अनुमति दिइएको थियो ।
बाइडेन प्रशासनले ‘सीएचएनभी’ले दक्षिणी अमेरिकी सीमामा अवैध क्रसिङलाई रोक्न मद्दत गर्नेछ तर्क गरेको थियो । त्यस्तै यसले अमेरिका प्रवेश गर्नेहरूको राम्रो जाँच गर्न अनुमति दिने बाइडेन प्रशासनको दाबी थियो । आन्तरिक सुरक्षा मन्त्रालयले सीएचएनभी कार्यक्रम आफ्नो लक्ष्यमा असफल भएको जनाउँदै पूर्व प्रशासनको आलोचना गरेको छ ।
बाइडेन प्रशासनका अधिकारीहरूले ‘आप्रवासीलाई अमेरिकी जागिरका लागि प्रतिस्पर्धा गर्ने अवसरहरू प्रदान गरेका थिए र अमेरिकी कामदार कटौती गरेको’ मन्त्रालयको विज्ञप्तीमा उल्लेख छ । त्यस्तै ठगी पहिचान हुँदा पनि निजामती कर्मचारीहरूलाई कार्यक्रमको प्रचार गर्न बाध्य पारेका र त्यसपछि उत्पन्न अराजकता र अपराधका लागि कांग्रेसमा रिपब्लिकनहरूलाई दोष लगाएका विज्ञप्तीमा उल्लेख छ ।
यद्यपि, संघीय दर्तामा भएको ३५ पृष्ठको सूचनामा सीएचएनभीअन्तर्गत अमेरिकामा रहेका केहीलाई व्यक्तिगत अवस्थाका आधारमा अनुमति दिइने उल्लेख छ । बीबीसीका अनुसार राष्ट्रपति ट्रम्पले रुससँगको द्वन्द्वको समयमा अमेरिका भागेका करिब २ लाख ४० हजार युक्रेनीहरूको अस्थायी कानुनी स्थिति रद्द गर्ने कि नगर्ने भन्ने बारे पनि विचार गरिरहेका छन् ।
सीएचएनभीले क्यारिबियन देशको बिग्रँदो अवस्थाबीच हाइटीका २ लाख १३ हजार जनालाई अमेरिका प्रवेश गर्न मद्दत गरेको जनाइएको छ । ट्रम्पले बन्द गर्नु अघि सीएचएनभी कार्यक्रमअन्तर्गत भेनेजुएलाका १ लाख २० हजार ७ सय, क्युबाका १ लाख १० हजार ९ सय र निकारागुआका ९३ हजार भन्दा बढीलाई अमेरिका प्रवेश गर्न अनुमति दिइएको थियो ।
गत महिना आन्तरिक सुरक्षा मन्त्रालयले अगस्टदेखि अमेरिकामा बसोबास गर्ने हाइटीका ५ लाख जनाका लागि अर्को अस्थायी संरक्षित स्थिति (टीपीएस) समाप्त गर्ने घोषणा गरेको छ । सशस्त्र द्वन्द्व वा वातावरणीय प्रकोप जस्ता असुरक्षित अवस्थाहरूको सामना गरिरहेका तोकिएका देशका नागरिकहरूलाई टीपीएस प्रदान गरिएको थियो ।
आन्तरिक सुरक्षा मन्त्रालयले अमेरिकामा भेनेजुएलाका लागि टीपीएस पनि रोकेको छ । यद्यपि यसले कानुनी चुनौतीको सामना गरिरहेको छ ।जनवरी २० मा पदभार ग्रहण गरेयता ट्रम्पका आप्रवासन नीतिहरूले धेरै कानुनी अवरोध सामना गर्नुपरेको छ ।
