विराटनगर । मोरङको सुन्दरहरैंचा नगरपालिका-७ स्थित महेन्द्र राजमार्गको मालती पुलनजिक भेटिएका चारवटा सिलिण्डर बम नेपाली सेनाले निस्क्रिय बनाएको छ ।
माओवादी सशस्त्र युद्धको समयमा राखिएका आइईडी (विस्फोटक उपकरण) नेपाली सेनाको बम डिष्पोजल टोलीले निष्क्रिय बनाएको हो ।
सूचना प्राप्त हुनासाथ खटिएको सेनाको टोली उक्त स्थानमा गई खोजतलास गर्दा चार वटा ग्यास सिलिन्डर फेला पारेको थियो ।
नेपाली सेनाको टोलीले गाडिएको अवस्थामा सिलिण्डर बम फेला पारेको थियो । त्यसक्रममा सेनाको बम डिस्पोजल टोलीले बम निस्क्रिय बनाएको मोरङ प्रहरीका प्रवक्ता डिएसपी बेदप्रकाश जोशीले जानकारी दिए ।
बम निस्क्रिय गर्ने क्रममा ठूलो आवाजका साथ विस्फोट भएको थियो । बिहीबार बिहानैदेखि पूर्वपश्चिम एसिएन हाइवेको उक्त खण्डमा आवत जावत बन्द गरिएको थियो ।
बमको खोजी गर्न र निस्क्रिय गर्न नेपाली सेनाको टोलीलाई बिहान बिहान ८ बजेदेखि बेलुका ५ बजेसम्म लागेको थियो ।
त्यसक्रममा २ वटा शिलिण्डर विस्फोट भएको र २ वटा सिलिण्डर खाली रहेको भेटिएको प्रहरीले जनाएको छ ।
