विराटनगर । रौतहट प्रहरीले कर्तव्य ज्यान मुद्दामा १६ वर्षदेखि फरार रहेका एक अभियुक्तलाई नियन्त्रणमा लिन सफल भएको छ। जिल्लाको कटहरिया नगरपालिका वडा नं– १ निवासी ५२ वर्षीय जितन महतो नुनियालाई प्रहरीले पक्राउ गरेको हो।
२०६५ साल पुस २४ गते महतोले आफ्ना भाइ हरिराम महतो नुनियाकी श्रीमती शारदा देवीलाई हत्या गरी बेपत्ता बनाएका थिए। हत्या गरिएको तीन दिनपछि शारदा देवीको शव खेतमा गाडेको अवस्थामा फेला परेको थियो।
घटनापछि महतो फरार भएका थिए। जिल्ला प्रहरी कार्यालय रौतहटका सूचना अधिकारी तथा प्रहरी निरीक्षक उमाशंकर प्रसादका अनुसार, महतोमाथि अदालतले जारी गरेको पक्राउ पुर्जीका आधारमा शुक्रबार उनलाई नियन्त्रणमा लिइएको हो।
अहिले अदालतबाट म्याद थप गरी घटनाको थप अनुसन्धान भइरहेको छ। फरार अभियुक्तलाई पक्राउ गर्ने अभियानकै क्रममा प्रहरीले पछिल्ला दिनमा एकैदिन ३३ फरार अभियुक्तलाई नियन्त्रणमा लिएको थियो।
१६ वर्षपछि भएको महतोको गिरफ्तारीले पीडित परिवारलाई न्यायको आशा दिलाएको छ। घटनाको छानविनलाई तीव्रता दिँदै अभियुक्तलाई कानुनी कारबाही गर्न प्रहरीले तत्परता देखाएको छ।
