विराटनगर । फुटबलमा होस् वा क्रिकेटमा । नेपाली खेलाडीहरू अनुशासनहीन भएर पटक–पटक कारबाहीमा परेको खबर हामीले सुन्दै आएका छौं ।
म्याच फिक्सिङको आरोपमा फुटबल नै हाप्नुपरेका खेलाडीदेखि जबरजस्ती करणीको आक्षेप लागेका सन्दीप लामिछानेसम्म । अनि, क्लोज क्याम्पमा पर्खाल नाघेर नाइट क्लबमा उद्दण्ड गर्ने खेलाडीसमेत नेपालका छन् ।
तर, विश्वफुटबलमा एउटा त्यस्तो खेलाडी छन्, जो अनुशासनको दायरा नाघ्न रुचाउँदैनन् । ती हुन्, विश्व चर्चित फुटबलर क्रिस्टियानो रोनाल्डो ।
पछिल्लो तीन दशकयता निरन्तर फुटबल खेलिरहेका रोनाल्डो उमेरले ३९ वर्ष पुगे । सात वर्षको उमेरदेखि फुटबल खेलिरहेका उनले विश्वफुटबलमा आफ्नो छुट्टै पहिचान बनाएका छन् ।
फुटबलमा विश्वकपको उपाधिबाहेक अरू सबै उपाधि जितिसकेका रोनाल्डो रक्सी पिउँदैन, धुम्रपान गर्दैनन्, ड्रग्स लिँदैनन् ।
यतिसम्म कि उनले सफ्ट ड्रिंक्स पनि लिँदैनन् । रोनाल्डोले यस्ता पदार्थ सेवन नगर्नुको पछाडि एउटा कारण, उनका बुबा हुन् ।
रोनाल्डोका पिता जोसे डेनिस एभिरोको अत्याधिक रक्सी सेवनका कारण ५२ वर्षको उमेरमा निधन भएको थियो । पिताको कुलतका कारण उनको बाल्यकाल एकदमै दुखदपूर्ण रहेको थियो ।
आफ्नो बाल्यका दुखद भए पनि आफ्नो बच्चाको बाल्यकाल सुखद रहोस भनेर, उनले जीवनमा कहिले पनि रक्सी पिएनन् । त्यसैले उनी रक्सी र चुरोटको लतबाट टाढा छन् ।
शरीरमा कुनै ट्याँटु खोपेका छैनन् । त्यसको पछाडि पनि एउटा कारण छ । रोनाल्डोले नियमित रक्तदान गर्ने गरेका छन् ।
सोही कारण उनले शरीरमा ट्याँटु नखोपेका हुन् । उनी नियमित रूपमा अभ्यास गर्छन् । रोनाल्डो दिनमा ३ हजार पल्ट सेटअप गर्छन् ।
उनले स्पेनका १०० मिटर दौडका च्याम्पियन डेभिड रोड्रिगेजलाई जिकज्याक दौडमा पराजित गरेका थिए । उनी व्यवसायिक एथ्लेक्स भन्दा पनि छिटो छन् । रोनाल्डो भलिबल खेलाडीभन्दा धेरै माथि उफ्रिन सक्छन् ।
रोनाल्डो स्वयम् आफ्नो मेडिकल रिपोर्टबाट अचम्मित हुन्छन् । रियल मड्रिडबाट कीर्तिमानी रकममा इटालियन क्लब युभेन्ट्स जाँदा उनको मेडिकल रिपोर्टबारे रोचक तथ्य बाहिर आएको थियो ।
मेडिकल रिपोर्टमा रोनाल्डो वास्तविक उमेरभन्दा उनको शरीर १३ वर्ष कान्छो देखिएको थियो । उनको मोटाइ, मांसपेशी र गति जाँचपछिको रिपोर्टअनुसार रोनाल्डोको शारीरिक क्षमता २० वर्षको मान्छेको जस्तै देखिएको थियो । रोनाल्डोको शरीरमा बोसो ७ प्रतिशत छ ।
शारीरिक रूपमा बलिया रोनाल्डो भावनात्मक रूपमा भने लचिला छन् । रोनाल्डो परोपकारी काममा दान गर्दछन् । उनी जातिवादमा विश्वास गर्दैनन् । स्वस्थकर खाना खाने उनी संसारको श्रेष्ठतम् खेलाडी हुन् ।
गिनिज वर्ल्ड रेकर्डमा १७ पटक नाम लेखाउन सफल भएका छन्, उनी । सामाजिक सञ्जालहरूमा सर्वाधिक फलोअर्स भएका संसारका एक मात्र व्यक्ति पनि हुन्, रोनाल्डो ।
क्रिस्टियानो रोनाल्डो दयालु तथा कमजोर आर्थिक परिवारबाट आएका हुन् । उनलाई गरिबी के हो राम्ररी थाहा छ । आज उनी धनी बनेका छन् र पनि अत्यन्तै बिनम्र छन् ।
अहिलेको सबै बिश्व समुदाय र मूलतः युवा मानिसको लागि रोनाल्डो एक राम्रो उदाहरण हुन् ।
पोर्चुगिज राष्ट्रिय फुटबल टोलीका कप्तान रोनाल्डो इतिहासकै सबैभन्दा चर्चित खेलाडी हुन् । जसले विश्व फुटबलमा सबैभन्दा धेरै ९१७ गोलसमेत गरेका छन् ।
पोर्चुगलको फनचल मेडिरामा जन्मिएका रोनाल्डोले स्वदेशकै क्लब लिस्बनबाट व्यवसायिक करिअर थालेका थिए । त्यहाँबाट इंग्ल्यान्ड, स्पेन, इटाली हुँदै उनी हाल साउदी अरेबियाको अल नासरबाट खेलिरहेका छन् ।
फुटबल करिअरको उत्तरार्धमा पुगे पनि रोनाल्डोमा अझै युवाकोजस्तै जोश–जाँगर छ ।
