विराटनगर । जिल्ला प्रहरी कार्यालय मोरङका प्रहरी उपरीक्षक नवराज कार्की प्रहरी प्रधान कार्यालय तानिएका छन् ।
आर्थिक अनियमिततामा मुछिएको पाइएपछि प्रहरी प्रधान कार्यालयले एक वर्ष नपुग्दै मोरङ प्रहरी प्रमुख कार्कीको जिम्मेवारी खासेको हो ।
गत वर्षको फागुन १ गते मोरङको एसपीका रूपमा विराटनगर आएका उनलाई ७ महिनामै प्रहरी हेडक्वाटरले तानेको हो ।
उदयपुरको कटारी–६ स्थायी घर भएका कार्की २०६८ सालमा संयुक्त राष्ट्रसंघको मिसनमा सहभागी भएर नेपाल प्रहरीको सान राखिसकेका व्यक्ति हुन् ।
तर, मोरङ आएपछि भने उनीमाथि आर्थिक अनियमितताको आरोप लागेको थियो । यसैले उनलाई प्रहरी हेडक्वार्टरको अपराध अनुसन्धान विभागमा सरुवा गरिएको हो ।
नेपाल प्रहरीका केन्द्रीय प्रवक्ता तथा डिआइजी दानबहादुर कार्कीले उनको सरुवा भएको भए पनि सरुवाको कारणबारे जानकारी नभएको सुनाए ।
प्रवक्ता कार्कीले सरुवाको कारण नबताए पनि उनी आर्थिक अनियमिततामा मुछिएको आरोप लागेको छ ।
उनको जिम्मेवारी खोस्दै उनको ठाउँमा अपराध अनुसन्धान कार्यालयकै अर्का एसपी राजन लिम्बूलाई जिल्ला प्रहरी कार्यालय मोरङमा सरुवा गरिएको छ ।
लिम्बु प्रहरी प्रधान कार्यालय स्थित अपराध अनुसन्धान विभागमा कार्यरत थिए । कार्कीलाई उनको ठाउँमा ल्याइएको हो ।
