एजेन्सी । भारतको बैंगलुरुमा नेपाली महिलाको बीभत्स हत्या भएको छ ।
बैंगलुरुको व्याली कवल क्षेत्रमा पर्ने ६ क्रस पाइप लाइन रोडस्थित तीनतले भवनभित्र २९ वर्षीया महालक्ष्मीको बीभत्स हत्या भएको हो ।
सो भवनको कोठामा १६५ लिटर मोडलको सिंगल डोर फ्रिजभित्र महालक्ष्मीको शव ३० देखि ४० टुक्रामा भेटिएको हो । साथै भुइँमा समेत शवका टुक्रा छरिएका थिए ।
छरिएका शवका टुक्रा संगेल्न फरेन्सिक टोलीले सरकारी अस्पतालबाट मूर्दाघरका कर्मचारीलाई नै बोलाउनु पर्यो ।
महालक्ष्मी सो घरमा पाँच महिनादेखि बस्दै आएकी थिइन् । उनी बस्ने तलको ढोका सेप्टेम्बर २१ मा १९ दिनपछि खुलेको थियो । उनी सो घरमा एक्लै बस्थिन् ।
उनी हरेक दिन बिहान नौ बजे घरबाट निस्किएर राति साढे १० बजेपछि मात्रै फर्किन्थिन् । त्यसैले छिमेकीलाई पनि उनको बारेमा खासै धेरै जानकारी नभएको बताइएको छ ।
२ सेप्टेम्बरपछि महालक्ष्मीको फोन एक्कासि बन्द भएपछि बैंगलुरुमै बस्ने उनको आमा र बहिनी चिन्तित भए ।
महालक्ष्मीको अपार्टमेन्टभित्रबाट नराम्रो दुर्गन्ध आउन थालेपछि २० सेप्टेम्बरमा सो भवनमा बस्ने केहीले भवन मालिकलाई गुनासो गरेका थिए ।
भाडामा बस्ने बेलामा महालक्ष्मीले आकस्मिक सम्पर्क भनेर बैंगलुरुमै बस्ने आफ्नी आमा र बहिनीको ठेगाना दिएकी थिइन् ।
सोही नम्बर खोजेर घरमालिकले उनको आमालाई फोन गरे । फोन आएपछि आमा पनि आत्तिएर आइन् । उनको साथमा फ्ल्याटको अर्को साँचो थियो ।
घर मालिक र छिमेकीको रोहबरमा अपार्टमेन्टको ढोका खोलियो । ढोका खुलेपछि भित्रबाट यति दुर्गन्ध आइरहेको थियो कि कोही भित्र जानै सकेनन् । केही बेर पछि मानिसहरू भित्र छिरे । भुँईभर रगतको टाटो थियो ।
शवका स–साना टुक्रा थिए । कोठाबाट फ्रिजसम्म रगतको धर्को सुकेको देखिन्थ्यो ।
यो देखेर भवन मालिकले तत्कालै प्रहरीलाई फोन गरिदिए । प्रहरी आएर फ्रिजमा हेर्दा महालक्ष्मीको खुट्टा र टाउको पाए । फ्रिजमा शरीरका अन्य कयौँ स–साना टुक्रा पनि थिए ।
फ्ल्याटमा खनतलासी गर्ने क्रममा मोबाइल फोन भेटिएको थियो । मोबाइलमा अन्तिम कल सेप्टेम्बर २ मा गरिएको थियो । यसको आधारमा प्रहरीले महिलाको मृत्यु सेप्टेम्बर २ वा ३ गते भएको हुन सक्ने अनुमान गरेको छ ।
महालक्ष्मीको हत्या किन गरियो ? मृत्युको कारण के थियो ? हत्यारा को हो भन्ने अहिलेसम्म थाहा हुन सकेको छैन । प्रहरीले यस मामिलामा छानबिन सुरु गरेको छ ।
भारतीय सञ्चारमाध्यम आजतकका अनुसार महालक्ष्मीका आमा र बहिनीसँग प्रारम्भिक सोधपुछ गर्दा सन् २०१९ सम्म पूरै परिवार नेपालमै रहेको खुलेको छ ।
सोही वर्ष महालक्ष्मीको विवाह हेमन्त दास नामका नेपाली केटासँग भयो । विवाहपछि दुवै जना रोजगारी र राम्रो जीवनको आशा लिएर नेपालबाट भारतको बेंगलुरु पुगेका थिए ।
जहाँ हेमन्तले मोबाइल पसलमा काम गर्न थाले भने उनकी पत्नी महालक्ष्मीले प्रख्यात् मलको सौन्दर्य पसलमा सेल्सवुमन टिम लिडरको काम पाइन् ।
उनीहरू बैंगलोरको नीला मंगला क्षेत्रमा भाडाको घरमा बस्न थाले । केही समयपछि छोरी जन्मियो ।
सन् २०२३ सम्म उनीहरूको जीवन ठीकठाक चलिरहेको थियो । तर २०२३ मा हेमन्त र महालक्ष्मी एकअर्कासँग छुट्टिए । छोरी हेमन्त दाससँग बस्थिन् ।
महालक्ष्मी भने ५ महिनादेखि व्यालिकवाल क्षेत्रमा भाडाको घरमा बस्थिन् । छोरीलाई भेट्न उनी १५ दिन वा महिनामा एकपटक हेमन्तको घर जान्थिन् ।
अनुसन्धानअनुसार हेमन्त र महालक्ष्मीबीचको दूरीको कारण त्रिकोणात्मक प्रेम थियो । हेमन्तले महालमक्ष्मी र उत्तराखण्डमा हेयर ड्रेसल काम गर्ने अशरफबीच प्रेम चलिरहेको आशंका गरेका थिए । यस विषयमा हेमन्त र महालक्ष्मीबीच धेरै झगडा पनि हुन्थ्यो ।
यही झगडाका कारण करिब ९ महिनाअघि महालक्ष्मी पति हेमन्तसँग अलग बस्न थालेकी थिइन् । केही महिना आमा र बहिनीसँग बसेपछि ५ महिनायता भने उनी एक्लै भाडाको घरमा बसिरहेकी थिइन् ।
