विराटनगर । विराटनगरबाट काठमाडौंतर्फ उड्दै गरेको बुद्ध एयरको जहाजभित्रै पाँच वर्षीय बालकको मृत्यु भएको छ ।
मृत्यु हुनेमा उदयपुरको त्रियुगा नगरपालिका-३ मोतीगडाका ताराकिरण राईका छोरा संयोगहाङ राई रहेका छन् ।
बुधबार दिउँसो १२:२४ बजे विराटनगरबाट ५७ जना यात्रु लिएर उडेको यूफोर ७१० कल साइनको जहाजमा उक्त घटना भएको हो ।
उडानको क्रममा बालकलाई अचानक श्वासप्रश्वासमा समस्या देखिएपछि जहाजलाई तत्काल विराटनगर फर्काइएको थियो ।
विमानस्थल पुगेपछि बालकलाई एम्बुलेन्समार्फत विराट नर्सिङ होम एवम् विराटनगर अस्पताल लगिएको थियो । तर अस्पताल पुर्याउनासाथ चिकित्सकले बालकलाई मृत घोषित गरेका हुन् ।
बालकलाई अघिल्लो दिन नै पेट दुखाइका कारण अस्पताल भर्ना गरिएको थियो ।
चिकित्सकहरूले सानो आन्द्रामा अवरोध देखिएको र तत्काल शल्यक्रिया गर्नुपर्ने सुझाव दिएका थिए । तर अभिभावकले थप उपचारका लागि काठमाडौं लैजाने निर्णय गरेका थिए ।
बुद्ध एयरका अधिकारीहरूले बालकको अवस्था जहाजबाट निकाल्दा सामान्य रहेको दाबी गरेका छन् ।
तर अस्पतालका चिकित्सकहरूले बालकको मृत्यु जहाजभित्रै भएको हुनसक्ने अनुमान गरेका छन् ।
डा. दीपराज अधिकारीका अनुसार अस्पताल ल्याउनुभन्दा करिब ४५ मिनेट अघि नै बालकको मृत्यु भएको हुनसक्छ ।
