विराटनगर । मोरङको विराटनगरमा घरको फ्ल्याट भाडामा लिएर युवतीहरूलाई अवैध हिसाबले यौन धन्दामा लगाउने गरिएको घटना बाहिर आएको छ।
विराटनगरको नयाँ गुद्री क्षेत्रमा रहेको उक्त फ्ल्याटमा प्रहरीले छापा मारी ६ जना युवतीलाई उद्धार गरेपछि यो घटना बाहिर आएको हो।
मोरङका प्रहरी प्रमुख प्रहरी उपरीक्षक नवराज कार्कीका अनुसार, इनरुवाका ३० वर्षीय राजकुमार साह र झापाकी २३ वर्षीया सन्ध्या चुँडालले विराटनगर-११ मा एक घरको फ्ल्याट भाडामा लिएर यो अवैध धन्दा चलाउँदै आएका थिए।
“आकर्षक रोजगारीको प्रलोभन देखाई काठमाडौं लगायत विभिन्न ठाउँबाट युवतीहरूलाई ल्याइएको थियो,” एसपी कार्कीले भने, “उनीहरूलाई जबरजस्ती यौन सम्पर्क गर्न बाध्य पारिन्थ्यो।”
उद्धार गरिएका युवतीहरू २१ देखि २३ वर्ष उमेर समूहका छन्। उनीहरू काठमाडौं, काभ्रेपलाञ्चोक, स्याङ्जा, उदयपुर र झापाका रहेका छन्।
प्रहरीका अनुसार, युवतीहरूलाई शारीरिक र मानसिक यातना दिइन्थ्यो। “उनीहरूको शरीरभरि कुटपिटका चोट र चुरोटका ठुटाले पोलेका घाउहरू देखिन्छन्,” एसपी कार्कीले थपे।
सन्ध्या चुँडाललाई पक्राउ गरिएको छ र उनीविरुद्ध मानव बेचबिखन मुद्दा चलाइएको छ। राजकुमार साह फरार रहेका छन्।
उनको खोजी भइरहेको प्रहरीले बताएको छ ।
उद्धार गरिएका युवतीहरूलाई एक महिला अधिकारवादी संस्थाको जिम्मा लगाइएको र उनीहरूलाई घर फिर्ता गराइएको प्रहरीले जनाएको छ।
