इटहरी । सुनसरीको इटहरी उपमहानगरपालिकामा भारतीय नम्बरप्लेटको कारले ठक्कर दिँदा सशस्त्रका सहायक प्रहरी निरीक्षक घाइते भएका छन् ।
घाइते हुनेमा संखुवासभाको चैनपुर नगरपालिका-३ घर भई सशस्त्र प्रहरी बल नेपाल नम्बर १ बराह बाहिनी मुख्यालय पकलीमा कार्यरत सहायक प्रहरी निरीक्षक २७ वर्षीय रविन कार्की रहेका छन् ।
आइतबार साँझ ७:३० बजेतिर इटहरी-१७ विवेक पेट्रोलपम्पस्थित पूर्व-पश्चिम राजमार्गमा कार्की सवार मोटरसाइकललाई कारले ठक्कर दिएको थियो ।
पश्चिमबाट पूर्वतर्फ जाँदै गरेको को २२ प ७२९२ नम्बरको मोटरसाइकललाई विपरीत दिशाबाट आउँदै गरेको बिआर ११ पिसी ५३८५ नम्बरको भारतीय कारले ठक्कर दिएको थियो ।
दुर्घटनामा घाइते भएका मोटरसाइकल चालक कार्कीलाई उपचारका लागि पूर्व क्षेत्रीय अस्पताल बराह बाहिनी पठाइएको प्रहरीले जनाएको छ ।
उनको दाहिने खुट्टामा सामान्य चोट लागेको छ ।
प्रहरीले कार चालक भारतको उराहा कटैया बस्ने २५ वर्षीय चन्दन सिंहलाई नियन्त्रणमा लिएको छ ।
कार तीव्र गतिमा चलाएका कारण दुर्घटना भएको प्रहरीको प्रारम्भिक अनुसन्धानले देखाएको छ ।
