विराटनगर । मोरङको सुन्दरहरैंचा नगरपालिकाको वडा नं. ६, ७ र ८ भित्र पर्ने दुई सडकखण्ड विस्तारको काम सुरु भएको छ । सडकलाई चारलेनमा विस्तार गर्ने कार्य बिहीबारबाट सुरु भएको हो ।
मोरङको सुन्दरहरैंचास्थित ‘चन्द्रनगरबाट पूर्वाञ्चल विश्वविद्यालय हुँदै गोठगाउँ’ र ‘महेश्वर सुब्बा मार्ग हुँदै लाटीझोडा’ सम्मको दुई सडकखण्ड विस्तारको काम सुरु भएको छ । नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीले बिहीबार उक्त दुई आयोजनाको शिलान्यास गरेका हुन् ।
सुन्दरहरैंचाको वडा ६, ७ र ८ भित्र पर्ने उक्त सडकखण्डहरुलाई दुवैतर्फ ड्रेनसहित दुईलेनमा स्तरोन्नति गर्ने योजना रहेको नगरपालिकाले जनाएको छ । पालिकाका अनुसार आगामी १ वर्षभित्र सम्पन्न हुनेगरी सडक स्तरोन्नतिको कार्य अघि बढाइएको सुन्दरहरैंचा नगरपालिकाका प्रमुख प्रशासकीय अधिकृत विनोदकुमार न्यौपानेले जानकारी दिए ।
सडक विस्तारका लागि नगरपालिकाले गत वैशाख १० गते नै मकवानपुरको लामा बानिया जेभीसँग सम्झौता गरिसकेको छ । कुल ४५ करोड ८५ लाख २३ हजार ६६९ रुपैयाँमा सडक विस्तार सम्झौता गरिएको नगरपालिकाले जनाएको छ ।
नगरपालिकाका अनुसार अब विस्तार हुने सडक दुवैतर्फ सडकबत्ती, फुटपाथ, पक्की ड्रेन, ८ वटा पाइप कल्भर्ट, १४ वटा बक्स कल्भर्ट र ट्राफिक लाईट सिग्नलसहितको हुनेछ ।
सडकको गुणस्तरमा कुनै कमी कमजोरी नहुने दाबी नगरपालिकाको छ । बिहीबार सडकको शिलान्यास गर्नुहुँदै एमाले अध्यक्ष ओलीले समेत सडक निमार्णमा कुनै किसिमको लापरबाही नगर्न निमार्ण कम्पनीलाई आग्रह गरेका छन् ।
चन्द्रनगर–विश्वविद्यालय–गोठगाउँ ४ किलोमिटर र महेश्वर सुब्बा मार्ग–लाटीझोडा ५ किलोमिटर सडकखण्ड भने विश्व बैंकको आर्थिक सहयोगमा स्तरोन्नति गर्न लागिएको जनाईएको छ ।
