विराटनगर । प्रहरीले श्रृंखलाबद्ध रूपमा पूर्वको विभिन्न स्थानमा सहकारी लुटपाट गर्ने गिरोहलाई पक्राउ गरेको छ ।
सुनसरीको इटहरीबाट शुक्रबार प्रहरीले ६ जनाको गिरोहलाई समातेको हो ।
कोशी प्रदेश प्रहरी कार्यालय विराटनगरको रिट, झापा, सुनसरी प्रहरीले संयुक्त रूपमा उनीहरूलाई पक्राउ गरेको हो ।
पक्राउ परेका समूहले झापामा मात्रै विभिन्न १३ स्थानमा लुटपाट गरेको पाइएको छ ।
पक्राउ पर्नेहरूमा जिल्ला मकवानपुर ईन्द्रसरोवर गाउँपालिका-५ का ३० वर्षीय सोमलाल स्याङ्तान, २१ वर्षीय सुनील भन्ने सन्तबहादुर स्याङ्तान, २२ वर्षीय सुनील स्याङ्तान, २५ वर्षीय बुद्ध स्याङ्तान, २६ वर्षीय सुजन स्याङ्तान र मकवानपुर गढी गाउँपालिका-८ का २८ वर्षीय अजय राना मगर रहेका छन् ।
पक्राउ परेका उनीहरूले विभिन्न मिति र समयमा १३ वटा सहकारीहरू योजनाबद्ध तरिकाले चोरी गरेको खुल्न आएको छ ।
झापामा केही दिन मात्रै गौरादह नगरपालिकाका दुई वटा सहकारी लुटपाट भएको थियो ।
गौरादह नगरपालिका-५ स्कूलचौन बजारमा रहेको जनहित सहकारीमा कार्यालय फोडेर चोरी भएको प्रहरीले जनाएको छ ।
त्यस्तै सोही वडाको चप्रामारीमा रहेको महारानी झोडा सहकारीमा पनि गएराति नै चोरी भएको जनाइएको छ ।
प्रहरीले उनीहरूको साथबाट मोटरसाइकल दुई थान, सहकारी चोरीमा प्रयोग गरेका विभिन्न औजारहरू र उनीहरूले उक्त समयमा प्रयोग गरेको कपडासमेत बरादम गरेको छ ।
उनीहरूले विभिन्न सहकारीहरूबाट ३० लाख १६ हजार ६ सय ८७ रुपैयाँ चोरी गरेको खुल्न आएको छ ।
पक्राउ परेका ६ जनालाई जिल्ला अदालत झापाबाट चोरी कसुरमा म्याद थप गरी अनुसन्धान भइरहेको जिल्ला प्रहरी कार्यालय झापाले जनाएको छ ।
