विराटनगर । विराटनगर महानगरपालिका-४ स्थित नोबल शिक्षण अस्पतालमा कार्यरत स्टाफ नर्स चन्द्रिकाकुमारी दासको हत्या भएको तीन दिनपछि उनका प्रेमीको शव फेला परेको छ ।
नोबेलको अर्थो विभागमा कार्यरत २५ वर्षीया दासको हत्यामा संलग्न रहेका प्रेमी २२ वर्षीय शिवशंकर दास मृतावस्थामा भेटिएका हुन् ।
विराटनगर-४ नोबल अस्पतालअगाडिको होटल फाइनको कोठा नम्बर १०२ उनी झुन्डिएको अवस्थामा गए राति फेला परेको मोरङ प्रहरीले जनाएको छ ।
मोरङ प्रहरी प्रमुख एसपी नवराज कार्कीका शिवशंकर झुन्डिएको होटल चन्द्रिकाको हत्या भएको कोठादेखि करिब ३ सय मिटर पूर्व-दक्षिणमा पर्छ ।
सिराहको फुल्काहकट्टी नगरपालिका घर भएकी नर्स चन्द्रिकुमारी विराटनगर–४ बुढाथोकी मार्गस्थित डाक्टर धीरेन्द्र गिरीको घरमा दुई महिना अगाडीदेखि कोठामा बस्दै आएकी थिइन् ।
शुक्रबार दिउँसो हत्या भएको अवस्थामा डेराको कोठाभित्र बाथरुममा उनको शव भेटिएको थियो ।
दासको घाँटी, अनुहारलगायत शरीरका विभिन्न भागमा धारिलो हतियारले हानेको गहिरो चोट रहेको थियो ।
चन्द्रिकाको हत्या उनकै प्रेमी शिवशंकरले गरेर फरार भएको आशंकामा प्रहरीले खोजी कार्य थालेको थियो ।
आइतबार दिउँसो विराटनगरको कञ्चनबारीतिर शिशवंकरले प्रयोग गर्ने फोनको लोकेशन देखाएको थियो ।
ट्र्याक गर्दै खोजी गर्ने क्रममा होटल फाइनमा प्रहरी टोली पुगेको थियो ।
एउटा होटलको ढोका नखुलेपछि फोडेर हेर्दा उनको शव झुन्डिएको अवस्थामा भेटिएको एसपी कार्कीले जानकारी दिए ।
शिवशंकर र चिन्द्रिकाको चार वर्षदेखि प्रेमसम्बन्धमा थिए । शिवशंकर वैदेशिक रोजगारीमा मलेसिया गएका थिए ।
उनी वैदेशिक रोजगारमा गएपछि चन्द्रिकाको सिएमए सिराहाका अमिन धानुकसँग प्रेम सम्बन्ध बसेको थियो ।
अर्कैसँग प्रेममा परेपछि हत्या गरिदिने मनसायले उनी गत फागुन २७ गतेमात्र मलेसियाबाट काठमाडौं फर्किएका थिए ।
उनी २९ फागुनमा विराटनगर आएको देखिन्छ । विराटनगर आएपछि उनी प्रेमी चन्द्रिकाकुमारीको डेरामा बसेको प्रहरीले जनाएको छ ।
प्रेममा उत्पन्न खटपटपछि बिहीबार दिउँसो हत्या भएको प्रहरीले जनाएको छ । हत्यामा किचनमा प्रयोग हुने कटर प्रयोग भएको छ । उक्त कटर प्रहरीले बरामदसमेत गरेको छ ।
हत्यापछि उनले आफ्नी दिदीलाई आइतबार दिउँसो फोन गर्दै अब आफू पनि आत्महत्या गर्छु भनेर सुनाएका थिए ।
हत्यापछि शिवशंकर दुई दिन कता गए त्यो अनुस्न्धान भइरहेको एसपी कार्कीले बताए ।
