विराटनगर । मोरङको विराटनगरस्थित शिक्षादीप कलेजले शनिबार सम्पन्न प्रदेशस्तरीय हाजिरी जवाफ प्रतियोगितामा उत्कृष्ट स्थान हाँसिल गर्न सफल विद्यार्थीहरुलाई सम्मान गरेको छ ।
कलेजले पिईए काठमाण्डौंद्वारा शनिबार आयोजित छनौट चरणको हाजिरी जवाफ प्रतियोगितामा प्रथम र द्वितीय स्थान हाँसिल गर्न सफल आफ्ना ४ जना विद्यार्थीहरुलाई सम्मान गरेको हो ।
मोरङ र सुनसरीका कुल ३४ टीममध्ये उत्कृष्ट प्रर्दशन गरेर उक्त स्थान हाँसिल गर्न सफल विद्यार्थीहरुलाई कलेजका प्रधानाध्यापक ज्ञानबहादुर खड्का र को–अर्डिनेटर नवीन कुमार रायले सम्मान गरेका हुन् ।
कलेज प्राङ्गणमा आईतबार एक कार्यक्रमको आयोजना गर्दै उनीहरुलाई नगद पुरस्कारसहित सम्मान गरिएको हो ।
कार्यक्रममा बोल्दै कलेजका प्रधानाध्यापक ज्ञानबहादुर खड्काले विद्यार्थीहरुभित्र भएको क्षमताले समग्र कलेजलाई नै गौरवान्वित तुल्याएको बताए ।
प्रतियोगितामा प्रथम र द्वितीय स्थान हाँसिल गर्न सफल विनय प्याकुरेल र अनमोल अधिकारी तथा प्रशान्त कार्की र निश्चल आचार्यको टीमलाई कलेजले ५/५ हजार नगद पुरस्कारसहित सम्मान गरेको हो ।
पिइएले भने मोरङको बुढीगङ्गास्थित मनमोहन प्राविधिक विश्वविद्यालयमा शनिबार कोशी प्रदेशस्तरीय हाजिरी जवाफ प्रतियोगिताको आयोजना गरेको थियो ।
प्रतियोगितामा कुल २/२ जना दरले कुल ३२ वटा टीमको सहभागिता रहेको थियो ।
जसमा विराटनगरस्थित शिक्षादीप कलेजमा अध्ययनरत विद्यार्थीहरुको दुई टीम हाजिरी जवाफ प्रतियोगितामा उत्कृष्ट प्रर्दशन गर्दै प्रथम र द्वितीय स्थान हाँसिल गर्न सफल भएको थियो ।
शनिबार सम्पन्न प्रतियोगिताका दुवै विजेता टीमलाई आयोजक पिईएले क्रमशः रु. १० हजार र ५ हजार नगद पुरस्कारसहित मेडल, ट्रफी र प्रमाणपत्रका साथ पुुरस्कृत गरिसकेको छ ।
पहिलो र दोश्रो स्थान प्राप्त गरेका टीमका विद्यार्थीहरुलाई आयोजकले काठमाण्डौंस्थित हिमालयन व्हाइट हाउस इन्टरनेशनल कलेजमा पूर्ण छात्रवृत्तिमा स्नातक अध्ययन गर्न पाउने अवसर समेत प्रदान गरेको छ ।
शनिबार सम्पन्न प्रतियोगिताबाट छनौटमा परेका विद्यार्थीहरुले भने आगामी अब जेठमा हुने अन्तर–प्रदेशस्तरीय फाईनल चरणको हाजिरी जवाफमा सहभागी हुन पाउने बताईएको छ ।
