विराटनगर । सुनसरीको बर्जु गाउँपालिकाले कोरोना भाइरस महामारीको समयमा शिक्षामा भएको ‘ग्याप’ कम गर्न आपुरण र द्रुत सिकाइ योजना थालेको छ ।
बर्जुका सामुदायिक विद्यालयका आधारभूत तह तथा माध्यमिक तहका शिक्षकको लागि दुई दिने आपुरण तथा द्रुत सिकाइ योजना बिहीबारबाट थालिएको हो ।
कोरोना महामारीका बेलामा पढाइमा आएको अन्तर कम गर्ने उद्देश्यका साथ यस्तो कार्यक्रम गरिएको बर्जु गाउँपालिकाका शिक्षा शाखा प्रमुख बाबुराम कार्कीले जानकारी दिए ।
२७ वटा सामुदायिक विद्यालयका शिक्षकहरूलाई सहभागी गरेर थालिएको कार्यक्रमको शुक्रबार समापन गरिँदै छ ।
खासगरी कोभिड–१९ लगायतका कारण शिक्षामा आइपरेका विभिन्न संकट र त्यसबाट परेका असरलाई कसरी रोकथाम गर्न सकिन्छ भनेर सिकाइएको कार्कीको भनाइ छ । यस्ता तालिमबाट शिक्षकले उत्प्रेरणा पाउने पनि उनले बताए ।
