विराटनगर । संखुवासभामा २० वर्षअघि भएको सामूहिक हत्या प्रकरणमा संलग्न एक महिला पक्राउ परेकी छन् ।
पक्राउ पर्नेमा चैनपुर नगरपालिकाकी ३५ वर्षीया कैली तामाङ रहेकी छन् ।
कर्तव्य ज्यान मुद्दामा अदातलबाट दोषी ठहर भए पनि सजाय भुक्तान नगरिकन फरार बनेकी उनलाई प्रहरीले मोरङको केराबारी गाउँपालिका-१० बाट पक्राउ गरेको हो ।
मोरङ प्रहरी प्रवक्ता प्रहरी नायब उपरीक्षक रन्जनकुमार दाहालका अनुसार तामाङलाई बुधबार पक्राउ गरिएको हो ।
उनी २०६० सालमा दुई जना पुरुषको सामूहिक हत्या गरिएको घटनामा संलग्न भएकी थिइन् ।
कर्तव्य ज्यान मुद्दाकी प्रतिवादी तामाङलाई घटनामा संलग्न रहेको भनेर संखुवासभा जिल्ला अदालत चैनपुरले दोषी ठहर गरिसकेको छ । अदालतले २०६६ साल फागुन १२ गते मुद्दाको किनारा लगाउँदै उनलाई २० वर्ष कैद सजाय हुने फैसला गरेको थियो ।
संखुवासभाको साविकको शिद्धकाली-२ का मंगल लिम्बू र योगेन्द्र दाहालको २०६० फागुन १० गते सामूहिक हत्या भएको थियो । पारिवारिक नाता सम्बन्धका आठ जना मिलेर उनीहरूको हत्या गरेको खुलेको छ ।
