सिन्धुली । सिन्धुलीकी शारदा थापामाथि डिभोर्सको विषयलाई लिएर कुटपिट भएको छ ।
कमलामाई नगरपालिका-४ की थापामाथि उनकै पति सन्तोष थापालगायत सात जनाले बिजुलीको पोलमा बाँधेर निर्घात कुटपिट गरेका हुन् ।
सिन्धुलीका प्रमुख जिल्ला अधिकारी भरत खनालका अनुसार थापामाथि पोलमा बाँधेर निर्घात कुटपिट भएको हो ।
पोलमा बाँधेर राखिएकै अवस्थामा उनको उद्दार भएको प्रजिअ अधिकारीले बताए । उद्दारको समयमा उनी बेहोस अवस्थामा थिइन् ।
कुटपिटको आरोपमा पति सन्तोषसहित सात जनालाई प्रहरीले पक्राउ गरिसकेको छ ।
पक्राउ परेका अन्य ६ जनामध्ये केही स्थानीय राजनीतिमा सक्रिय रहेका व्यक्ति रहेको बताइएको छ ।
तर प्रहरीले उनीहरूको नाम सार्वजनिक गरेको छैन ।
बयान लिनेक्रममा लेनदेनदेखि डिभोर्ससम्मका विषय आएको प्रजिअ खनालले बताए ।
शारदाले डिभोर्सका लागि अदालतमा मुद्दा दर्ता गराएपछि त्यो मुद्दा फिर्ता गराउनका लागि कुटपिट भएको हुनसक्ने प्रहरीको आशङ्का छ ।
यस विषयमा थप अनुसन्धान भइरहेको प्रहरीले जनाएको छ ।
