रतुवामाई । कोसी प्रदेशका पर्यटन, वन तथा वातावरणमन्त्री गणेश उप्रेती सुशीलले रतुवामाई नगरपालिका-२ स्थित डोरिया आधारभूत विद्यालयको अनुगमन गरेका छन् ।
आफ्नो निर्वाचन क्षेत्र पुगेका मन्त्री उप्रेतीले जीर्ण अवस्थामा रहेको सो विद्यालयको अनुगमन गरेका हुन् ।
घरुचोकस्थित डोरिया आधारभूत विद्यालय यो वडाको सबैभन्दा ठुलो विद्यालय हो ।
पहिला विद्यार्थीले भरिभराउ रहने विद्यालयको अवस्था अहिले नाजुक छ ।
विद्यार्थीले दैनिक ज्ञान आर्जन गर्ने विद्यालको भवन जीर्ण छ ।
जस्तापाता उप्किएको र प्वाल परेकाले गर्दा वर्षात्को पानी चुहिने समस्या भोग्न बाध्य छन्, विद्यार्थी ।
विद्यार्थीको सङ्ख्या घट्दै अहिले सयमा झरेको विद्यालयका प्रधानाध्यापक मोहम्मद कासिम मुद्दिनले गुनासो पोखेका छन् ।
अरू सार्वजनिक विद्यालयमा विद्यार्थीको आकर्षण रहेको अवस्थामा यो विद्यालय छायामा परेको उनको दुखेसो छ ।
यसैबीच, अनुगमनमा पुगेका मन्त्री उप्रेतीले प्रदेश सरकारबाट उक्त विद्यालयको स्तरोन्नति हुने बताएका छन् ।
सामाजिक विकास मन्त्रालयसँग समन्वय गरेर विद्यालयको छानो फेरिदिने उनको प्रतिबद्धता छ ।
भिडिओ हेर्न यहाँ थिच्नुहोस् ।
