‘इन्स्टेन्ट ब्लड डोनर’ (आईबीडी)ले आफ्नाे प्रथम साधारणसभा तथा अधिवेशन सम्पन्न गरेकाे छ ।
रक्तदाता र रगत आवश्यक पर्नेबीच समन्वय गर्दै आइरहेकाे आईबीडीकाे प्रथम अधिवेशनले अध्यक्ष सुरेन्द्र मल्लको नेतृत्वमा ११ सदस्यीय नयाँ कार्यसमिति चयन गरेको छ ।
२०७५ फागुनबाट सुरू भएकाे संस्थाले चार वर्षदेखि निरन्तर काम गर्दै आइरहेकाे छ । अनौपचारिक रुपमा चार वर्षअघि सुरू भएकाे संस्थाले २०७९ मा संस्था दर्ता प्रकृया पूरा गरेसँगै प्रथम साधारणसभा सम्पन्न गरेकाे हाे ।
‘बिरामी र रक्तदाताबीच मध्यस्तकर्ता’काे भूमिका निर्वाह गर्ने मुल उद्देश्यसहित स्थापित संस्थाले रगतको खाँचो परेका बिरामीहरुलाई रक्तदातासँग तत्काल सम्पर्क गराई सेवा प्रदान गर्दै आइरहेको छ । त्यसबाहेक समय-समयमा सचेतना कार्यक्रम, रक्तदान शिविर तथा नेतृत्व विकास सम्बन्धि तालिमहरु पनि आयोजना गर्दै आइरहेको छ ।
समितिकाे उपाध्यक्षमा सुस्मिता श्रेष्ठ, सचिवमा विष्णु कार्की, सहसचिवमा निकेश मैनाली, कोषाध्यक्षमा रितेश अग्रवाल र सदस्यमा कविता काेइराला रहेकी छन् । आईबीडीकाे नयाँ कार्यसमितिकाे पहिलाे बैठकले बाँकी सदस्य पदपूर्ति गर्ने अध्यक्ष मल्लले बताएका छन् ।
