त्रिकाेणात्मक टी२०आई सिरिज अन्तर्गत घरेलु राष्ट्र नेपालले आज पपुवा न्युगिनीसँग खेल्दैछ ।
कीर्तिपुरस्थित टीयू अन्तर्राष्ट्रिय क्रिकेट रङ्गशालामा दिउँसो १२ः३० सुरू हुने खेलमा नेपाल सिरिजको तेस्रो जित दर्ता गर्दै फाइनल यात्रा सहज बनाउन चाहन्छ ।
यता पपुवा न्युगिनी (पिएनजी) भने सिरिजको पहिलो खेलमा भोगेको हारको बदला लिन चाहन्छ ।
सिरिजको चौथो खेलसम्म पिएनजी जितविहीन छ । मलेसिया, नेपाल र पिएनजी सम्मिलित त्रिदेशीय टी२०आई सिरिजमा पिएनजीले दुई खेल खेलिसकेको छ ।
डबल राउन्ड रोबिन लिगका आधारमा हुने सिरिजमा पिएनजीले घरेलु राष्ट्र नेपालसँग पहिलो र मलेसियासँग दोस्रो खेल खेलेको थियो ।
तर पहिलो खेलमा नेपालसँग १५ रनले पराजित भएको पिएनजीले दोस्रो खेलमा मलेसियाविरुद्ध ८ रनको हार व्यहोरेको थियो ।
अङ्कविहीन बनेको पिएनजी नेपालविरुद्ध जित दर्ता गर्दे सिरिजमा आफ्नो लय समात्न चाहन्छ ।
यता युवा कप्तान सन्दिप लामिछानेको नेतृत्वमा पहिलो टी२०आई सिरिज खेलिरहेको नेपाल भने शतप्रतिशत जित दर्ता गर्दै घरेलु भूमिमा नै सिरिज उपाधि रक्षा गर्न चाहन्छ ।
सिरिज अन्तर्गत दुई खेल खेलिसकेको नेपाल चार अङ्कसहित अङ्कतालिकाको शीर्ष स्थानमा छ । एक खेल कम खेलेको मलेसिया दुई अङ्कका साथ दोस्रो स्थानमा रहँदा नेपाल समान दुई खेल खेलेको पिएनजी अङ्कविहीन छ ।
सिरिज अन्तर्गत नेपाल र पिएनजी २८ मार्च (सोमबार)मा आमनेसामने भएका थिए ।
टस जितेर पहिले फिल्डिङ गर्ने निणर्य गरेको पिएनजीविरुद्ध नेपालले पूरै २० ओभर खेल्दै नौ विकेटको क्षतिमा एक सय ८३ रनको लक्ष्य दिएको थियो ।
सो खेलमा नेपालका माथिल्लो क्रममा ब्याटरले उत्कृष्ट प्रदर्शन गरेका थिए ।
नेपालका लागि ओपनर आशिफ शेखले सर्वाधिक ४३, रोहित पौडेलले ३४, आरिफ शेखले ३१ र कुशल भुर्तेलले २० रनको योगदान दिएका थिए ।
पिएनजीका चाल्र्स अमिनी, अलेई नाओ र चाड सोपरले समान दुई-दुई विकेट लिँदै नेपाललाई सस्तैमा रोक्न प्रयास गरे पनि विफल भयो ।
मध्यम लक्ष्य पछ्याएको पिएनजीको सुरुवात भने खराब रह्यो ।
ओपनर टोनी उरालाई पाँच रनमै पेभिलियनमा पाएको पिएनजीका लागि सातौं नम्बरमा ब्याटिङ गर्न आएका नोरमान भानुवाले सर्वाधिक ५२ रन बनाउँदै टोलीलाई जित नजिक पुर्याए पनि असफल रहे ।
पिएनजीका लागि सेसे बाउले ३०, चाल्र्स अमिनीले २२ र लेगा सियाका २१ रनको योगदान दिए पनि त्यो अपूरो रह्यो ।
आक्रमक ब्याटिङ गरेपनि नेपाल बलिङमा चुक्दा पिएनजीलाई सस्तैमा रोक्न सकेन । नेपालले प्रयोग गरेका चार मुख्य बलरमध्ये कप्तान सन्दिप लामिछानेको इकोनोमि मात्रै सबैभन्दा कम रह्यो ।
तीव्र गतिका बलरविरुद्ध निकै हाबी भएका पिएनजीका तीन ब्याटरलाई पेभिलियन फर्काएका लामिछानेले तीन विकेट लिए ।
स्पिनर लामिछाने बाहेक करन केसीले तीन, अविनाश बोहराले दुई र सोमपाल कामीले एक विकेट लिए ।
सुधारिएको ब्याटिङ गरिरहेको नेपालले आजको खेलमा बलिङमा पनि सुधार गर्न सके नतिजा सहजै आफ्नो पक्षमा पार्न सक्छ ।
तर अङ्कविहीन बन्दै तालिकाको अन्तिममा रहेको पिएनजी नेपाललाई कडा टक्कर दिने तयारीमा छ ।
दुई एकदिवसिय र ट्राई नेसन टी२०आई सिरिजका लागि नेपाल भ्रमणमा आएको पिएनजी त्यहीँ राष्ट्र हो जसले नेपालविरुद्धको एकदिवसिय सिरिज क्लिन स्विप गरेको थियो ।
