पोर्चुगल र पोल्यान्ड यसै वर्ष एसियाली राष्ट्र कतारमा आयोजना हुने फिफा विश्वकप फुटबल २०२२ का लागि छनोट भएका छन् ।
युरोपियन छनोटको प्ले अफअन्तर्गत फाइनल खेल जित्दै पोल्यान्ड र पोर्चुगलले विश्वकपका लागि कतार भ्रमण पक्का गरका हुन् ।
पोर्चुगल लगातार छैटौँ पटक विश्वकपमा छनोट भएको हो ।
युरोपियन छनोटअन्तर्गत मङ्गलबार राति भएको प्ले अफको फाइनलमा नर्थ म्यासेडोनियालाई २-० गोलले हराउँदै पोर्चुगलले कतार भ्रमण निश्चित गरेको हो ।
पोर्टोस्थित पोर्चुगलको मैदानमा घरेलु टोलीलाई जित दिलाउन ब्रुनो फर्नान्डेजले दुई गोल गरे । उनले खेलको ३२औँ मिनेटमा गोल गर्दै पोर्चुगललाई सुरुआती अग्रता दिलाएका थिए ।
६५औँ मिनेटमा फर्नान्डेजले व्यक्तिगत दोस्रो गोल गर्दै पोर्चुगललाई २-० को जित दिलाए ।
यस्तै, गएराति भएको युरोपियन छनोटतर्फको प्लेअफको खेलमा स्विडेनलाई २–० गोलले हराउँदै पोल्यान्डले कतार यात्रा तय गरेको छ ।
घरेलु मैदानमा पोल्यान्डलाई जिताउन रोबर्ट लेवान्डोस्की र पाइट्र लिजेन्स्कीले एक–एक गोल गरे ।
पहिलो हाफ गोलरहित बराबरीमा सकिएको उक्त खेलको दोस्रो हाफमा दुई गोल गर्दै पोल्यान्डले कतार भ्रमण निश्चित गरेको हो ।
खेलको ४९औँ मिनेटमा लेवान्डोस्कीले पेनाल्टीमा गोल गर्दै पोल्यान्डलाई सुरुवाती अग्रता दिलाएका थिए ।
७२औँ मिनेटमा जिलेन्स्कीले गोल गरेपछि पोल्यान्ड २–० गोलले विजयी भयो ।
छनोटका नियमित खेलबाट छनोट हुन असफल भएका कारण यी दुवै टिमले प्ले अफका खेल खेलेका थिए ।
अब युरोपबाट विश्वकपमा छनोट हुने एक टिमको टुङ्गो लाग्न बाँकी छ ।
जसमा स्कटल्यान्ड र युक्रेनबीच खेल हुने छ । यो खेल जुनमा हुने तय छ । विजेताले वेल्ससँग भिड्ने छ ।
अब युरोपबाट वेल्स वा स्कटल्यान्ड र युक्रेन मध्ये एक टिम विश्वकपमा पुग्नेछन् ।
यसपटकको विश्वकप २१ नोभेम्बरदेखि १८ डिसेम्बरसम्म चल्ने छ ।
विश्वकपको इतिहासमै पहिलोपटक विश्वकपका खेलहरू समरमा नभई विन्टरमा हुन लागेको हो ।
यस विश्वकपमा स्थान बनाउनका लागि विभिन्न राष्ट्रहरूले छनोट खेल खेलिरहेका छन् ।
युरोपियन च्याम्पियन इटाली भने लगातार विश्वकपमा छनोट हुन असफल भयो ।
बिहीबार राति भएको युरोपियन छनोटको प्ले अफ खेलमा नर्थ म्याकाडोनियासँग १–० गोलले हारेसँगै इटालीको कतार यात्रा असम्भव भएको हो ।
