त्रिकोणात्मक टी२०आई सिरिज अन्तर्गत आज घरेलु टोली नेपालले पपुवा न्युगिनीसँग सिरिजको पहिलो खेल खेल्दैछ ।
कीर्तिपुरस्थित टीयू अन्तर्राष्ट्रिय क्रिकेट रङ्गशालामा हुने ट्राई नेसन सिरिजमा नेपाल, पपुवा न्युगिनी (पिएनजी) र मलेसिया सहभागी हुँदैछन् ।
आज हुने पहिलो खेलमा पिएनजीविरुद्ध जित दर्ता गर्दै नेपाल घरेलु टोलीमा विजयी सुरुवात गर्न चाहन्छ । तर नेपाललाई पिएनजीविरुद्ध खेल्न त्यति सहज भने हुनेछैन ।
दुई एकदिवसिय खेल र ट्राई नेसन सिरिजका लागि नेपाल भ्रमणमा आएको पिएनजीले नेपालविरुद्धको एक दिवसिय सिरिज २-० ले क्लिन स्विप गर्दै आफ्नो क्षमता देखाइसकेको छ ।
आईसिसी क्रिकेट विश्वकप लिग टू अन्तर्गत नेपाल, युएई र पिएनजी सम्मिलित त्रिकोणात्मक एक दिवसिय सिरिजमा नेपालविरुद्धको दुवै खेल गुमाएको पिएनजीले त्यसलगत्तैको नेपाल भ्रमणमा घरेलु टोलीलाई उत्कृष्ट प्रदर्शन गर्दै हार चखाएको थियो ।
ब्याटिङ चले पनि बलिङमा कमजोर देखिएको नेपाल आज सोही गल्तिलाई सच्याउँदै पिएनजीलाई हराउन चाहन्छ । तर घरेलु टोलीलाई लगातार हराएको पिएनजी सोही प्रदर्शनलाई निरन्तरता दिन चाहन्छ ।
आजको खेलमा दिपेन्द्रसिंह ऐरी र कुशल भुर्तेललाई नेपालका तर्फबाट ब्याटिङमा प्लेयर्स टू वाचका रुपमा हेरिएको छ ।
नेपालका ओपनर समेत रहेका भुर्तेलको टी२० ब्याटिङ लोभलाग्दो भए पनि पछिल्लो समय खस्किएको छ । टीयु रङ्गशालाबाट नै चम्किएका भुर्तेललाई आज सोही स्थानबाट पुनः पूरानो ब्याटिङ फर्म ल्याउने अवसर छ ।
ब्याटिङमा अब्बल मानिने दिपेन्द्रको पछिल्लो खेलमा चल्न सकिरहेका थिएनन् । तर पिएनजीविरुद्धको दोस्रो ओडिआईमा एक सय पाँच रनको शतकीय इनिङ खेल्दै आफू फर्केको जानकारी दिइसकेका ऐरी आजको खेलमा प्लेयर्स टू वाच हुनेछन् ।
पिएनजीका तर्फबाट भने कप्तान आसद भालालाई आजको खेलमा महत्वपूर्ण मानिएका छन् । दोस्रो खेलमा शुन्य रनमा नै पेभिलियन फर्किएको भए पनि पहिलो खेलमा पिएनजीको कीर्तिमान योगफल बनाउन उनै भालाले ६० रनको अर्धशतकीय इनिङ खेलेका थिए ।
पिएनजीका कप्तान भाला र नोसाइना पोकनालाई बलिङतर्फबाट प्लेयर्स टू वाचका रुपमा हेर्न सकिन्छ ।
नेपालका तर्फबाट कप्तान सन्दिप लामिछाने र तीव्र गतिका बलर अविनाश बोहरालाई बलिङमा प्लेयर्स टू वाचका रुपमा हेर्न सहिन्छ ।
आज पहिलो खेल खेल्ने नेपालले दोस्रो खेलमा बुधबार मलेसियाविरुद्ध खेल्नेछ ।
