आइसिसी विश्वकप क्रिकेट लिग–२ अन्तर्गत त्रिदेशीय सिरिजमा नेपालले सोमबार (आज) पुनः घरेलु टोली युएईको सामना गर्दै छ ।
अघिल्लो खेलमा खराब ब्यटिङका कारण पराजित नेपालले तेस्रो खेलमा घरेलु टोली युएईको सामना गर्न लागेको हो ।
युएई र नेपालबीचको खेल दुवई क्रिकेट रङ्गशालामा बिहान ११:१५ बजे सुरु हुने छ ।
यसअघि नेपाल युएईसँग एक सय ६९ रनको झिनो विजय लक्ष्य पछ्याएर पनि हार खेप्न बाध्य भएको थियो ।
नेपाल युएईसँग ४८ रनले पराजित भएको थियो ।
पहिलो खेलमा भने नेपालले पपुवा न्युगिनी (पिएनजी) माथि दुई विकेटको रोमाञ्चक जित निकालेको थियो ।
अब, आज युएईलाई हराउँदै नेपाल सिरिजमा दोस्रो जित निकाल्न चाहन्छ ।
यता, युएई सिरिजको आफ्नो अन्तिम खेलमा तेस्रो जितको खोजीमा छ ।
पहिलो खेलमा युएईले पसएनजीलाई ७ विकेटले हराएको थियो ।
दोस्रो खेलमा नेपाललाई हराएको युएई पिएनजीसँग तेस्रो खेलमा ६ विकेटले पराजित भएको थियो ।
सिरिजमा सुधार गर्न नेपाललाई युएईविरुद्ध ब्याटिङमा आमूल सुधार गर्नुपर्ने चुनौती छ ।
नेपाली टोलीका प्रशिक्षक पुवुदु दसानायके र कप्तान सन्दीप लामिछानेले समेत नेपालको ब्याटिङमा सुधार गर्नु पर्ने बताएका छन् ।
युएई नेपालका लागि बलियो प्रतिद्वन्द्वी हो ।
एक खेल गुमाइसकेको नेपालका लागि दोस्रो खेलमा बदला लिने अवसर पनि छ ।
नेपाल र युएईबीच अहिलेसम्म पाँचवटा एक दिवसीय खेल भएका छन् ।
जसमा युएईले तीन र नेपालले दुई खेल जितेको छ ।
नेपालले यस लिगको अन्तिमम खेल मङ्गलबार पीएनजीसँग खेल्नेछ ।
लिग–२ मा अहिले तालिकाको शीर्ष स्थानमा रहेको ओमानले २७ खेलबाट ३६ अङ्क बनाएको छ ।
दोस्रो स्थानमा रहेको युएईको १७ खेलबाट २० अङ्क छ ।
१२ खेलबाट १६ अङ्क बनाएको स्कटल्यान्ड १६ अङ्कसहित तेस्रो स्थानमा छ ।
१६ खेलबाट १४ अङ्क बनाएको अमेरिका चौथो स्थानमा रहँदा १३ खेलबाट १२ अङ्क बनाएको नामिविया पाँचौँ स्थानमा छ ।
१० खेलबाट १० नै अङ्क बनाएको नेपाल छैटौँ स्थानमा रहादा १५ खेलबाट दुई अङ्क बनाएको पिएनजी अन्तिममा छ ।
प्रत्येक टोलीले ३६ खेल खेलेपछि शीर्ष तीनमा रहने टोली सन् २०२३ मा भारतमा आयोजना हुने एकदिवसीय विश्वकप क्रिकेटमा छनोट हुनेछन् ।
