विश्व क्लब फुटबल भिड्न्तमध्ये सबैभन्दा चर्चितमध्येको एक हो एल क्लासिको ।
स्पेनिस फुटबल क्लब बार्सिलोना र रियल मड्रिडबीच हुने एल क्लासिको आज राती रियलको घरेलु मैदान सान्टियागो बर्नाबाउमा हुँदैछ ।
यसै सिजन भएको पहिलो भेटमा बार्सिलोनालाई २–१ गोलान्तरले पराजित गरेको रियल ला लिगाको शीर्ष स्थानमा छ ।
२८ खेल खेलिसकेको रियलको ६६ अङ्क छ भने एक खेल कम खेलेको बार्सिलोना ५१ अङ्कका साथ चौथो स्थानमा छ ।
बार्सिलोनालाई पाखा लगाउँदै रियल एल क्लासिकोमा आफ्नो वर्चश्व कायम राख्न चाहन्छ । किनकी पछिल्ला भिडन्तमा बार्सिलोनाले रियलविरुद्ध जित दर्ता गर्न सकेको छैन ।
जारी सिजन दुई पटक आमनेसामने भइसकेका यी दुईको यो तेस्रो भेट हो ।
पहिलो पटक ला लिगाको १०औं चरणमा भिडेका यी दुईमध्ये रियलले २–१ गोलान्तरको जित दर्ता गरेको थियो ।
डेभिड अलाबाले ३२औं र लुकास भासकोइजले अतिरिक्त समय रियलका लागि गोल गरेका थिए ।
बार्सिलोनाका लागि सान्त्वना गोल सर्जियो अगुइरोले अतिरिक्त समयको ९७औं मिनेटमा गोल गरे हारबाट टोलीलाई जोगाउन सकेनन् ।
त्यसपछिको यी दुईको दोस्रो भेट स्पेनिस सुपरकोपाको सेमिफाइनलमा भएको थियो । रोमान्चक बनेको खेलमा पनि रियलले नै बाजी मारेको थियो ।
लगातार तीन पटक अग्रता लिँदै रियलले ३–२ गोलान्तरको जित दर्ता गर्याे ।
साउदी अरेबियास्थित किङ फाहद अन्तर्राष्ट्रिय रङ्गशालामा भएको खेलमा फेड्रिको भाल्भार्डेले अन्तिम समयमा गोल गर्दै रियललाई जिताए ।
खेलको २५औं मिनेटमा भिनिसियस जुनियरको गोलमार्फत रियलले सुरुवाती अग्रता लिएको थियो ।
तर लुक डी योङले ४१औं मिनेटमा बार्सिलोनाका लागि गोल गरेपछि पहिलो हाफ बराबरीमा सकिएको थियो ।
दोस्रो हाफको ७१औं मिनेटमा करिम बेन्जेमाले गोल गर्दै रियललाई दोस्रो पटक अग्रता दिलाए । तर बार्सिलोनाका लागि आन्सु फातीले ८३औं मिनेटमा गोल फर्काएपछि खेल रोमान्चक बनेको थियो ।
रोमान्चक बनेको खेललाई रियलको पक्षमा पार्ने काम भने लुका मोर्डिचको स्थानमा मैदान प्रवेश गरेका फेड्रिको भाल्भर्डेले गरेका थिए ।
भिनिसियस जुनियरले राइट फ्ल्याङ्कबाट निकालिदिएको पासलाई कन्ट्रोल गर्दै पहिलो बार च्यापेर भाल्भर्डेले गरेको प्रहारले जाली चुमेपछि बार्सिलोना फाइनल पुग्नबाट रोकिएको थियो ।
आज हुने एल क्लासिको बार्सिलोनाका लागि अझ विशेष हुनेछ । किनकी पछिल्ला केही सिजनदेखि लगातार खराब प्रदर्शन गरिरहेको बार्सिलोना पूर्व खेलाडी जाभी हर्नान्डेज मुख्य प्रशिक्षकका रुपमा भित्रिएसँगै सुधार हुँदैछ ।
कुनैबेला लिग अङ्कतालिकाको शीर्ष दशभित्र भित्र पर्न प्रयासरत बार्सिलोनामा हर्नान्डेजको जादू चलिरहेको छ ।
पछिल्ला पाँच खेलमा अपराजित रहेको बार्सिलोना उस्तै प्रदर्शन गरिरहेको रियललाई स्तब्ध बनाउन चाहन्छ ।
आफ्नो प्रशिक्षणमा खेलिएको एक मात्रै एल क्लासिकोमा पराजय भोगेका जाभी आज सान्टियागोमा विजयी झन्डा गाड्न चाहन्छन् ।
तर रियलका प्रशिक्षक कार्लाे एन्सेलोटीको रणनीतिविरुद्ध खेल्न जाभीलाई त्यति सहज भने हुनेछैन ।
हुन त रियलका मुख्य हतियार फ्रान्सेली स्टार करिम बेन्जेमाको अनुपस्थितीको पूर्ण फाइदा बार्सिलोनाले आज उठाउनु पर्नेछ । तर के बार्सिलाेना आजकाे खेलमा सफल हाेला त ?
याे पनिः बेन्जेमाले एल क्लासिको गुमाउने
