नेपालले आइसिसी विश्वकप लिग–२ त्रिकोणात्मक एकदिवसीय सिरिजअन्तर्गत बुधबार (आज) पपुवा न्युगिनी (पिएनजी) सँग खेल्दै छ ।
नेपाल र पिएनजीबीचको खेल नेपाली समय अनुसार बिहान ११:१५ मा युएईको सारजाह क्रिकेट स्टेडियममा सुरु हुने छ ।
सन्दीप लामिछानेको कप्तानीमा रहेको नेपाल आज पीएनजीलाई हराउँदै सिरिजमा सुखद सुरुआत गर्न चाहन्छ ।
पिएनजी भने नेपाललाई हराएर पहिलो जित निकाल्ने योजनामा रहेको छ ।
नेपालले करिब ६ महिनापछि एकदिवसीय अन्तर्राष्ट्रिय खेल खेल्न लागेको हो ।
नेपालले अन्तिम पटक गत भदौमा एकदिवसीय अन्तर्राष्ट्रिय खेलेको थियो ।
त्यसयता नेपालले घरेलु क्रिकेटमा समेत ५० ओभरको खेल खेलेको छैन ।
घरेलु क्रिकेटको एक मात्र ५० ओभरको प्रतियोगिता प्रधानमन्त्री कप (पिएम कप) समेत आइसिसी टी–ट्वान्टी विश्वकप छनोटको तयारी भन्दै टी–ट्वान्टी फर्म्याटमा खेलिएको थियो ।
यसअघि पिएनजीविरुद्ध दुई एकदिवसीय खेल खेलेकोमा नेपालले दुवै जित निकालेको छ ।
नेपालले खेलेका पछिल्ला पाँच ओडिआईमा तीन खेलमा जित निकालेको छ । पपुवा न्युगिनी पाँच खेलमानै पराजित भएको छ ।
नेपाल कमजोर पिएनजीमाथि लगातार तेस्रो जित निकाल्ने सोचका साथ मैदान प्रवेश गर्ने छ ।
नेपालले गत सेप्टेम्बरमा पिएनजीलाई दुई ओडिआई सिरिजमा २ विकेट र १ सय ५१ रनले हराएको थियो ।
लगातार कमजोर प्रदर्शन गर्दै आएको पपुवा न्युगिनीमाथि नेपाल सहज जित निकाल्ने सोचमा हुनेछ ।
सन्दीप यसै खेलमार्फत ओडिआईमा डेब्यू कप्तानी गर्नेछन् ।
सन्दीप पारस खड्का र ज्ञानेन्द्र मल्लपछि ओडिआईमा कप्तानी गर्ने तेस्रो नेपाली खेलाडी हुनेछन् ।
खेलको पूर्वसन्ध्यामा कप्तान लामिछानेले पिएनजीलाई कम आँक्न नमिल्ने बताएका थिए ।
“हरेक खेल महत्वपूर्ण छन् । यो प्रतियोगितामा आएपछि सबै टोली उतिकै बराबर छन् । युएई आफ्नो वर्तमान समयको उत्कृष्ट एसोसिएट टोली हो । पपुवा न्युगिनीले यो साइकलमा खेल नजितेपनि कमजोर आक्न मिल्दैन,” उनले भनेका थिए ।
विश्व क्रिकेट लिग–२ मा आठ खेलमा आठ अङ्क जोडेको नेपाल छैटाैँ स्थानमा छ ।
युएई तेस्रो र पिएनजी पुछारमा रहेको छ ।
नेपालले दोस्रो खेल ४ चैतमा युएईसँग, तेस्रो खेल ७ चैतमा युएईसँग नै र ८ चैतमा अन्तिम खेल पिएनजीसँग खेल्ने छ ।
लिग टुमा सात टिम सहभागी छन् ।
सिरिज खेल्नुअघि नेपालले तयारीस्वरूप श्रीलङ्कामा चार अभ्यास खेल खेलेको थियो ।
जसमा नेपालले ३ खेल जित्दा अन्तिम खेलमा पराजित भएको थियो ।
