लेग स्पीनर सन्दीप लामिछानेले राष्ट्रिय पुरुष क्रिकेट टिमको पनि कप्तानीको जिम्मेवारी पाउने भएका छन् ।
नेपाल क्रिकेट सङ्घ (क्यान)ले सन्दीप लामिछानेलाई एकदीवसीय क्रिकेट टोलीको पनि कप्तान बनाउने भएको हो ।
सन्दीप लामिछानेलाई एकदिवसीय टोलीको पनि कप्तानको जिम्मेवारी दिएको क्यानका कार्यवाहक सचिव प्रशन्त मल्लले जानकारी दिए ।
यसअघि उनले टी–२० राष्ट्रिय क्रिकेट टोलीमा कप्तानको जिम्मेवारी पाएका थिए ।
सन्दीपले यसअघि हालै ओमानमा सम्पन्न आइसिसी टी–२० विश्वकप ग्लोटबल छनोट खेलमा नेपालको कप्तानी गरेका थिए ।
उनको नेतृत्वमा नेपाल अपराजित रहँदै सेमिफाइनलसम्म पुगेको थियो ।
क्वालिफायरको समूह चरणको पहिलो खेलमा नेपालले ओमानविरुद्ध खेलेको थियो ।
पहिलो खेलमा ओमानलाई ७८ रनमै समेटेर ३९ रनको जित निकाल्दै विजयी सुरुवात गरेको नेपालले दोस्रो खेलमा फिलिपिन्सलाई एक सय ३६ रनको विशाल अन्तरले हराएको थियो ।
फिलिपिन्सलाई ८२ रनमै समेटेको नेपाल समूह चरणको अन्तिम खेलमा क्यानडालाई आठ विकेटलाई हराउँदै सेमिफाइनल प्रवेश गरेको थियो ।
समूहको शीर्ष स्थानमा रहँदै समूह चरणका खेल सकेको नेपालले अन्तिम खेलमा क्यानडालाई ८० रनमै समेटेको थियो ।
तर सेमिफाइनलमा युएइसँग पराजित भएपछि नेपालको दोस्रो पटक टी२० विश्वकपमा छनोट हुने नेपालको सपना अधुरै भएको थियो ।
नेपालले पछिल्लो पटक २०१४ मा बङ्गलादेशमा सम्पन्न टी२० विश्वकपमा सहभागीता जनाएको थियो ।
त्यसता नेपालले विश्वकपमा स्थान बनाउन सकेको छैन ।
नेपालले सन्दीपको कप्तानीमा मार्च १६ देखि २२ तारिखसम्म युएईमा आयोजना हुने आइसिसी विश्वकप लिग–२ को त्रिकोणात्मक एकदिवसीय सिरिज खेल्दै छ ।
सो सिरिजमा सन्दीपले नेपालको कप्तानी गर्ने भएका छन् ।
सिरजमा नेपालले पहिलो खेल मार्च १६ तारिख पपुवा न्युगिनी (पिएनजी), मार्च १८ मा युएई, मार्च २१ मा पुनः युएई र मार्च २२ मा पिएनजीसँग प्रतिस्पर्धा गर्ने छ ।
लिग–२ मा सात टोलीको सहभागी छन् ।
लिगमा आठ खेलबाट आठ अङ्क बनाएको नेपाल छैटौँ स्थानमा छ ।
अहिलेसम्म शीर्ष स्थानमा रहेको ओमानले २३ खेलबाट ३० अङ्क बनाएको छ ।
१२ खेल खेलेको स्कटल्यान्ड १६ अङ्कसहित दोस्रो स्थानमा छ ।
तेस्रो स्थानमा रहेको अमेरिकाले १६ खेलबाट १४ अङ्क बनाएको छ ।
१० खेल खेलेको युएईको १२ अङ्क, नौ खेल खेलेको नामिबिया १० अङ्क छ ।
१२ खेल खेलेको पिएनजीले कुनै पनि जित निकाल्न सकेको छैन ।
