इङ्लिस क्लब म्यानचेस्टर युनाइटेड युरोपको सर्वाधिक ठुलो क्लब फुटबल प्रतियोगिता च्याम्पियन्स लिगको प्रि-क्वाटरफाइनलमा पराजित हुन पुगेको छ ।
मङ्गलबार राति घरेलु मैदान ओल्ड ट्राफोल्डमा युनाइटेड स्पेनिस क्लब एथ्लेटिको मड्रिडसँगको दोस्रो लेगमा १-० गोलले पराजित भएको हो ।
एथ्लेटिकोको मैदान वान्डा मेट्रोपोलिटानोमा भएको पहिलो लेग १-१ गोलको बराबरीमा खेलेको युनाइटेड समग्रमा २-१ गोलको हार व्यहोर्दै च्याम्पियन्स लिगको अन्तिम १६ बाटै बाहिरिएको छ ।
खेलको पहिलो हाफको ४१औं मिनेटमा ब्राजिलियन डिफेन्डर रेनान लोडीले एन्टोनी ग्रिजमनको क्रसलाई हेडरमार्फत एक मात्र निर्णायक गोल गरेका थिए ।
युनाइटेडले बल पोजिसनमा अधिकांश समय पकड जमाएपनि गोल गर्न भने सकेन ।
एथ्लेटिकोविरुद्ध पोर्चुगिज स्टार क्रिस्टियानो रोनाल्डोले खेल अवधिभरि खेले पनि कुनै जादू देखाउन सकेनन् ।
युनाइटेडका स्ट्राइकर रोनाल्डोको एथ्लेटिकोविरुद्ध तथ्याङ्क उत्कृष्ट छ ।
रोनाल्डोले एथ्लेटिकोविरुद्ध ३७ खेल खेल्दा ३० गोलमा योगदान दिएका छन् ।
उनले एथ्लेटिकोविरुद्ध २५ गोल र पाँच असिस्ट गरेका छन् ।
रोनाल्डो सम्मेलित टोलीले एथ्लेटिकोलाई १६ पटक हराएको छ भने १० पटक बराबरी खेलेको छ ।
यस्तै, नौ खेलमा भने रोनाल्डोको टिमले हार बेहोरेको छ ।
अनि रोनाल्डो सम्मेलित रियलले सन् २०१४ र २०१६ गरी दुई पटक च्याम्पियन्स लिगको फाइनलमा पुगेर एथ्लेटिकोलाई हराउँदै उपाधि जितेको छ ।
सन् २०१० मा ला लिगाअन्तर्गत रियल मड्रिडले एथ्लेटिकोलाई २–० गोलले हराउँदा रोनाल्डोले पहिलो पटक एथ्लेटिकोविरुद्ध खेलेका थिए ।
त्यसयता उनले एथ्लेटिकोको पोस्टमा चार पटक ह्याट्रिक गोल गरिसकेका छन् ।
यसैले पनि प्रशिक्षक राल्फ राङ्गनिकले उनलाई प्लेइङ सेटमै राखेका थिए ।
३७ वर्षीय रोनाल्डोले अघिल्लो खेलमा पनि ह्याट्रिक गर्दै सनसनी मच्चाएका कारण प्रशिक्षक उनको प्रदर्शनबाट लोभिएका थिए ।
रोनाल्डोको ह्याट्रिक गोलको सहायतामा इङ्ग्लिस प्रिमियर लिगमा म्यानचेस्टर युनाइटेडले टोटनह्याम हटस्परमाथि जित दर्ता गरेको थियो ।
शनिबार राति घरेलु मैदानमा युनाइटेडले टोटनह्यामलाई ३–२ गोलले हराएको हो ।
त्यसैगरी आजै सम्पन्न अर्को खेलमा पोर्चुगिज क्लब बेनफिकाले अजाक्सामाथि जित निकाल्दै च्याम्पियन्स लिगको क्वाटर फाइनलमा प्रवेश गरेको छ ।
पहिलो लेग २-२ गोलको बराबरी खेलेको बेनफिकाले आजको दोस्रो लेगमा अजाक्सलाई १-० गोलले पराजित गर्दै समग्रमा ३-२ गोलले अन्तिम आठमा आफ्नो स्थान पक्का बनाएको हो ।
